Գերմանիան Ռուսաստանի իշխանություններից բացատրություն է սպասում Ալեքսեյ Նավալնիի թունավորման հետ կապված իրավիճակի վերաբերյալ, նա հանցագործության զոհ է դարձել: Այս մասին լրագրողների հետ հանդիպման ժամանակ հայտարարել է Գերմանիայի կանցլեր Անգելա Մերկելը:
«Այժմ ակնհայտ է, որ Ալեքսեյ Նավալնին հանցագործության զոհ է դարձել: Նրան փորձել են լռեցնել: Եվ ես, Գերմանիայի կառավարության անունից, դատապարտում եմ նրա հետ կատարվածը»,- ասել է Մերկելը:
Նրա խոսքով, Նավալնիի դեմ հանցագործությունն ուղղված է «այն հիմնական արժեքների ու իրավունքների դեմ, որոնց համար մենք կանգնած ենք»:
Նա հավելել է, որ Գերմանիայի իշխանությունները «համատեղ խորհրդակցություններ կանցկացնեն» ԵՄ-ի և ՆԱՏՕ-ի գործընկերների հետ և ռուսական կողմի բացատրությունից հետո միասնական պատասխանի վերաբերյալ որոշում կընդունեն:
«Կան լուրջ հարցեր, որոնց միայն Ռուսաստանի կառավարությունը կարող է և պետք է պատասխանի»,- ասել է Մերկելը:
