Երևանում մեկնարկել է հայ-լեհական գործարար համաժողով, որին մասնակցելու համար Լեհաստանից ժամանել են տնտեսության տարբեր ճյուղերի շուրջ 20 ներկայացուցիչներ: Համաժողովը կազմակերպել է զարգացման հայկական գործակալությունը:
Ինչպես նշեց Լեհաստանի տեղեկատվության և արտասահմանյան ներդրումների գործակալության ղեկավար Լավոմիս Մայման, Լեհաստանը լավ երկիր է փորձի փոխանակման համար, իրենք պատրաստ են աջակցել Հայաստանին, որպեսզի հայերը չկրկնեն լեհերի սխալները: «Լեհաստանը շատ ավելի մոտ է, քան կարելի է պատկերացնել: Ես մեծացել եմ՝ դիտելով Փարաջանովի ֆիլմերը, լսելով Առնո Բաբաջանյանի ստեղծագործությունները»: Մայմանի խոսքերով՝ Լեհաստանը պատրաստ է ճգնաժամի հետևանքները հաղթահարելու համար գործուն աջակցություն ցուցաբերել Հայաստանին:
ՀՀ էկոնոմիկայի փոխնախարար Արա Պետրոսյանը Հայաստանի բիզնես միջավայրը որակեց որպես տարածաշրջանում և նույնիսկ աշխարհում ամենաբարենպաստներից մեկը: «Այն տնտեսական համագործակցությունը, որ այսօր կա, ներդրումների ծավալները չեն համապատասխանում այն քաղաքական երկխոսությանը, որ կա մեր երկու երկրների միջև: Առևտրաշրջանառությունը 30 միլիոն դոլար է, ինչը շատ քիչ է»: Ա. Պետրոսյանը նշեց, որ Հայաստանը ճգնաժամից հետո գերագնահատում է իրավիճակը, կառավարությունը պատրաստել է առաջնահերթ ոլորտների 7 փաթեթ, որոնցից են նորարական տեխնոլոգիաները, գյուղատնտեսությունը, տեղեկատվական հասարակության ձևավորումը, կենսաթոշակային և առողջապահական բարեփոխումները և այլն:
Համաժողովի ընթացքում ստորագրվեցին համագործակցության երեք հուշագրեր՝ զարգացման հայկական գործակալության ու Լեհաստանի տեղեկատվության և արտասահմանյան ներդրումների գործակալության, երկու երկրների արդյունաբերողների միությունների և առևտրաարդյունաբերական պալատների միջև: Համաժողովի ընթացքում կներկայացվեն երկու երկրների ներդրումային միջավայրերը, տեղի կունենան ֆինանսաբանկային ոլորտի վերաբերյալ կլոր սեղաններ: Նշենք, որ 2010 թվականին Հայաստանի և Լեհաստանի միջև առևտրաշրջանառությունը կազմել է 21.2 միլիոն դոլար, որից արտահանումը՝ 1.9 միլիոն դոլար, ներմուծումը` 19.2 միլիոն դոլար: Հիմնականում արտահանվում են կաուչուկ, խմիչքներ, աղ, ցեմենտ, քար, իսկ ներմուծվում են մեխանիզմներ, եթերային յուղեր, կոսմետիկա, էլեկտրական սարքավորում, շաքար, դեղագործական ապրանքներ և այլն:
