Այսօր Ախալքալաքի ոստիկանության շենքի դիմաց բողոքի ակցիա են անցկացրել Թորիա գյուղի բնակիչները: Նրանք պահանջում են ազատ արձակել ձերբակալված երիտասարդներին, որոնց նկատմամբ այսօր դատարանը որպես խափանման միջոց է ընտրել նախնական կալանքը:
Ախալքալաքի շրջանային դատարանում օգոստոսի 26-ին տեղի է ունեցել Նինոծմինդայի շրջանի Թորիա գյուղի արոտավայրերում տեղի ունեցած ծեծկռտուքի գործով դատական նիստը, որն անցել է օնլայն համակարգով: Բերման ենթարկվածների նկատմամբ կիրառվել է երկամսյա նախնական կալանք:
«Մենք ուզում ենք, որ մեր տղաներին բաց թողեն: Մեզ ասել էին, որ բաց կթողեն, բայց բանից պարզվում է 2 ամիս կալանքի տակ են թողնելու: Մեր պահանջն է, որ ազատ արձակեն երիտասարդներին, որովհետև նրանք անչափահաս երեխայի են պաշտպանել: Խոտհունձի ժամանակ խնդիր է առաջացել, թուրքերը հարձակվել են մեր վրա: Թուրքերն անչափահաս երեխային ծեծել են»,- Jnews-ի հետ զրույցում ասել է բողոքի ակցիայի մասնակիցներից մեկը:
Թորիա գյուղի բնակիչների խոսքով, Նինոծմինդայի տեղական իշխանություններն իրենց խոստացել էին, որ բերման ենթարկված երեք երիտասարդներին ազատ կարձակեն, սակայն դատարանը կալանավորելու որոշում է ընդունել:
«Առավոտյան ժամը 9-ից նստած ենք, ոչ մի ոստիկան մեզ չի մոտեցել, ոչինչ չէին ասում, ժամը երեքի կողմերը եկան ասացին, որ մեր տղաներին երկու ամսով կալանավորում են, այսքան բան: Նինոծմինդայի քաղաքապետը մեզ խոստացավ, որ մեր տղաներին 48 ժամ հետո բաց կթողեն, բայց ինչպես տեսնում եք, նրանց ձերբակալեցին»,- ասել է Ախալքալաքի ոստիկանության շենքի դիմաց հավաքվածներից մեկը:
Թորիա գյուղի բնակիչները JNEWS-ի հետ զրույցում ասել են, որ օգոստոսի 23-ի ծեծկռտուքի մասնակիցներն ազատ շրջում են Նինոծմինդայում:
«Ամբողջ շրջանում, բոլորը նշում են, որ թուրքերն իրենց նեղում են: Թող երկու շրջանը ոտքի կանգնի, այս խնդրին պետք է լուծում տրվի, թե չէ մի գյուղը բան չի փոխի: Ընտրության ժամանակ ասում են, ու՞ր են թորիացիները, դե հիմա թող գան պաշտպանեն: Ավազակապետն ազատ շրջում է Նինոծմինդայում»,- ասել է բողոքի ակցիայի մասնակիցներից Խաչատուրը:
«Իմ որդին ձեռքից հաշմանդամ է, թուրքն իրեն խփել է, կասեք թուրքն ո՞վ է, որ գա իմ արտում իմ որդուն խփի: Մեր պապական 100 տարվա հողերը գնացել ենք քաղելու, թուրքն ասում է չպիտի քաղես: Ոստիկանությունը մեզ համոզելով բերեց հասցրեց այստեղ»,- նշել է մեկ այլ մասնակից:
Թորիա գյուղի բնակիչներն Ախալքալաքի ոստիկանության շենքի մոտից հեռացել են պայմանով, որ 4-5 օրից տղաներին ազատ կարձակեն, իսկ հակառակ դեպքում նրանք այլ քայլերի կդիմեն:
Օգոստոսի 23-ին Նինոծմինդայի շրջանի Թորիա գյուղի բնակիչների և եկվոր ադրբեջանցիների միջև ընդհարում է տեղի ունեցել: Պատճառն այն է, որ եկվորներն իրենց ոչխարներին արածեցրել են գյուղացիներին պատկանող արոտավայրերում, ինչն էլ դժգոհություն է առաջացրել. ընդհարումն ավարտվել է ծեծկռտուքով:
Վրաստանի ներքին գործերի նախարարությունը հետաքննություն է սկսել ՔՕ-ի 126-րդ հոդվածի առաջին պրիմա մասով, բ և գ ենթակետրով, ինչը ենթադրում է բռնություն: Ինչպես նաև ՔՕ-ի 225-րդ հոդվածի երկրորդ մասով, որը նշանակում է խմբակային բռնության կազմակերպում, ղեկավարում և այդ ամենին մասնակցություն:
