Սահմանադրական բարեփոխումների մասնագիտական հանձնաժողովի նիստում որոշում է կայացվել ստեղծել Գերագույն դատարան, որի արդյունքում Սահմանադրական և Վճռաբեկ դատարանները կմիավորվեն: Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Վահագն Հովակիմյանը և ՀԱԿ իրավական հանձնաժողովի ներկայացուցիչ Արմեն Խաչատրյանը:
Սահմանադրական և Վճռաբեկ դատարանների միավորման հեռանկարը քննարկումների տեղիք է տվել: «Խոսքը լուծարման մասին չէ, այսինքն՝ Սահմանադրական և Վճռաբեկ դատարանների միավորումը չի ենթադրում, որ ՍԴ և Վճռաբեկ դատարանի դատավորները պետք է հեռանան»,- նշեց Վահագն Հովակիմյանը՝ հավելելով, որ դեռևս հայեցակարգն է քննարկման դրվել, և լուրջ մասնագիտական քննարկում պետք է անցկացվի, և մասնագիտական կարծիքները պետք է հաշվի առնվեն:
Եթե այս հայեցակարգը կյանքի կոչվի, որքանո՞վ է Սահմանադրական և Վճռաբեկ դատարանների միավորումը նպաստելու դատական համակարգի արդյունավետությանը: Այս հարցին ի պատասխան Արմեն խաչատրյանը նշեց. «Չեմ պատկերացնում, թե ինչպիսի անցումային դրույթներ կարող են լինել, որոնք ՍԴ անդամներին կտան Գերագույն դատարանի դատավորի կարգավիճակ: Խնդիր կարող է առաջանալ: Պետք է ընտրության կամ նշանակման նոր կարգ սահմանել: Պետք է հասկանալ՝ արդյո՞ք չենք քանդում համակարգ, և այս պրոցեսը եթե տեղի ունենա, չի ենթադրվում, որ դատական համակարգի արմատական փոփոխություն է տեղի ունենալու՝ կառուցվածքի, կոնցեպտի առումով»: Ա. Խաչատրյանը նաև հավելեց, որ եթե այս փոփոխությունը երկու-երեք փոփոխություն իրականացնելու համար է, ապա անընդունելի է:
«Դեմ արտահայտվողների փաստարկներից մեկն այն է, որ այս դատարանների միավորման արդյունքնում կունենանք հզոր ատյան,- նշեց Վահագն Հովակիմյանը,- բայց ես կարծում եմ, որ դատական համակարգի բարեփոխումներից հետո մաքրված համակարգի պահպանման միակ ձևը հենց հզոր ատյան ունենալն է»:
Մանրամասն՝ տեսանյութում:
