Հայ պետհիդրոմետի օպերատիվ հիդրոօդերևութաբանության կենտրոնի տնօրեն Զարուհի Պետրոսյանը այսօր լրագրողների հետ հանդիպման ժամանակ հայտնեց է, որ առաջիկա օրերին սպասվում է օդի ջերմաստիճանի բարձրացում։
Արդեն երեկ Արարատյան օդի ջերմաստիճանը դաշտում հասել է 39-ի։
Այսօր և վաղը այց ցուցանիշը կպահպանվի, սակայն շաբաթ-կիրակի Սյունիքում և Արարատում սպասվում է 40 աստիճան օդի ջերմաստիճան։ Ըստ Զարուհի Պետորսյանի՝ օդի խոնավությունը հասել է նվազագույնի։ «Օդի նման բարձր ջերմաստիճանը նորմալ է հուլիսի վերջի և օգոստոսի սկզբի ժամանակահատվածի համար, առանձնահատկությունը բարձր ջերմաստիճանի տևականության մեջ է»,-ասում է Զարուհի Պետրոսյանը։
Ուլտրամանուշակագույն ճառագայթները ևս հասել են վտանգավոր՝ 7 ցուցանիշի։ Ամենաբարձրը հրդեհավտանգությունն է։ Զարուհի Պետրոսյանը հորդորում է խուսափել կրակ վառելուց։ Այս օրերին աննախադեպ է նաև հողի ջերմաստիճանը. այն հասել է առավելագույն՝ 70 աստիճանի։
Երեկ Հայպետհիդրոմեդը նախազգուշացում է ուղարկել համապատասխան ոլորտները վերահսկողներին։ Զարուհի Պետրոսյանը խորհուրդ է տալիս կրել բամբակյա, սպիտակ հագուստ, սնվել բանջարեղենով և հաճախ լոգանք ընդունել։
Օդի ջերմաստիճանը կսկսի նվազել օգոստոսի 2-ից։