Հայ ազգային կոնգրեսի կենտրոնական գրասենյակի ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը, այսօր Մամուլի ազգային ակումբում խոսելով ներքաղաքական զարգացումներից, նշեց. «Կա՛մ պետք է տեղի ունենան արտահերթ ընտրություններ՝ երկխոսության միջոցով, կա՛մ արտահերթ ընտրություններ տեղի են ունենում համաժողովրդական ճնշման ներքո: Չնայած երկխոսության տարբերակն էլ ինքնին նշանակում է համաժողովրդական ճնշման ներքո, որովհետև ՀՀ իշխանությունները ընդդիմության հետ երկխոսության գնացել են այն գիտակցությամբ, որ իրենք չկարողացան 2008 թվականի մարտի 1-ից հետո ջարդել, կոտրել համաժողովրդական շարժումը, քաղաքացիական պայքարի կամքը:
Ես այսօր Հայաստանում տեղի ունեցող երկխոսությունը գնահատում եմ որպես ժողովրդի պարտադրանքի արդյունք, որի պրոցեսը ղեկավարել է Հայ ազգային կոնգրեսը և ես կարծում եմ, որ իրականում, այո՛, այսօր բանակցում են Հայ ազգային կոնգրեսի և իշխանության պատվիրակությունները, և իրականում Հայ ազգային կոնգրեսի պատվիրակությանը ես այլ կերպ կանվանեմ նաև Ազատության հրապարակի պատվիրակություն և իշխանության պատվիրակություն»:
Ն.Փաշինյանը նշեց, որ իշխանությունն ընկրկեց ժողովրդի ճնշման առջև, իսկ ինչ վերաբերում է հարցին, թե եթե մինչև Կոնգրեսի սահմանած ժամկետներում արտահերթ ընտրություններ տեղի չունենան, որոնք կլինեն Կոնգրեսի քայլերը, Ն.Փաշինյանը նշեց. «Եթե բանակցություններն իշխանության հետ արտահերթ նախագահական և խորհրդարանական ընտրությունների մասով արդյունքներ չտվեցին՝ տեղի կունենա ջրբաժան, այսինքն՝ եթե արտահերթ ընտրությունների հասնելու հնարավորությունը համարենք սպառված, Հայ ազգային կոնգրեսն այդ բանակցություններում անելու բան չի ունենա, անելու բան կունենա Ազատության հրապարակում»:
