ՀԺԿ անդամ, ՀԱԿ պատվիրակության ներկայացուցիչ Ֆելիքս Խաչատրյանը լրագրողների հետ հանդիպմանը խոսեց իշխանություն -ընդդիմություն երկխոսության մասին: «Երկխոսությունը շարունակվում է և ընթացքի մեջ է։ Այն թեև ուշ սկսվեց, բայց նորմալ է ընթանում»,-ասաց Ֆելիքս Խաչատրյանը՝ տեղեկացնելով, որ երկխոսության համար ժամկետ է սահմանվել մինչև սեպտեմբերի 1-ը: Նրա խոսքով՝ ներկայումս երկխոսության թեման մեկն է. անցկացնել արտահերթ նախագահական, ապա խորհրդարանական ընտրություններ, ինչը երկիրը ճգնաժամից հանելու միակ ելքն է:
«Եթե երկխոսության ընթացքում համաձայնություն ձեռք չբերվի, այդ դեպքում երկրի ճակատագիրը կփոխանցենք ժողովրդին»,- ասաց ՀԱԿ պատվիրակության ներկայացուցիչը՝ հավելելով, որ ժողովուրդը այս դեպքում զանգվածային հավաքների միջոցով հանգիստ, առանց առճակատման գնալու, պետք է ազդի իշխանության վրա։ «Կարծում եմ, որ իշխանությունը փոխվել է, նա տեսնում է, որ ճնշումներով, ջարդերով ժողովրդին այլևս պահել չի լինի»:
Ֆելիքս Խաչատրյանի կարծիքով՝ միակ ելքն այն է, որ Սերժ Սարգսյանը հրաժարական տա՝ մտածելով ժողովրդի մասին: «Երբ գա վճռական պահը, ժողովուրդը իր խոսքը կասի»,- եզրափակեց նա՝ հույս հայտնելով, որ իշխանությունները պատրաստ կլինեն լսել ու ընդունել իրենց առաջարկը, այն է՝ մինչև գարուն անցկացնել արտահերթ նախագահական ընտրություններ: