Ամերիկայի նախագահի ավագ քույրը՝ թոշակառու դատավոր Մարիաննա Թրամփ-Բարին, եղբորը համարում է անսկզբունքային անձնավորություն, որին չի կարելի վստահել, ինչի մասին է վկայում Դոնալդ Թրամփի զարմուհու՝ Մերիի հետ գաղտնի ձայնագրված զրույցը: Նա ձայնագրությունը տվեց The Washington Post-ին:
Միացյալ Նահանգների ղեկավարը 2018-ին ԱՄՆ ժամանող միգրանտների մեծածավալ հոսքի ֆոնին քրոջն առաջարկել է սահման ուղարկել: Թոշակառու դատավորը քննադատեց եղբորը, քանի որ Սպիտակ տան վարչակազմը վարում է «զրոյական հանդուրժողականության» քաղաքականություն, այսինքն ՝ ներգաղթյալներին քրեական պատասխանատվության են ենթարկում՝ նրանց զավակներից անջատելով:
«Նա սկզբունք չունի: Բացարձակապես ոչ մի հատ: Եթե աստվածավախ մարդ ես, ձգտում ես օգնել մարդկանց, ոչ թե այն, ինչ անում ես հիմա: Նրան չի կարելի վստահել», – ասաց պետության ղեկավարի 83-ամյա քույրը:
ԱՄՆ նախագահ Թրամփի զարմուհին՝ Մերին, որը կլինիկական հոգեբանության դոկտորի կոչում ունի, մեկ ամիս առաջ հրատարակել է «Չափից շատ, բայց ոչ բավարար. ինչպես իմ ընտանիքը ստեղծեց աշխարհում ամենավտանգավոր մարդուն» գիրքը, որում նա պնդում է, թե Դոնալդ Թրամփը ընտանիքի դաժան վերաբերմունքի պատճառով զրկված է մարդկանց ապրումակցելու ունակությունից և բազմաթիվ բարդույթներ ունի: ԱՄՆ նախագահը գիրքն անվանեց ստահոդ և սարսափելի:
