Օմսկի հիվանդանոցի բժիշկները, որտեղ կոմայի մեջ պառկած է Ռուսաստանի ընդդիմության առաջնորդ Ալեքսեյ Նավալնին, հրաժարվել են թույլատրել նրա տեղափոխումը: Այս մասին հայտարարել է քաղաքական գործիչի մամուլի քարտուղար Կիրա Յարմիշը ուրբաթ, օգոստոսի 21-ին:
Յարմիշը հայտարարել է, որ Նավալնու տեղափոխման արգելքը սպառնում է նրա կյանքին։
«Նավալնու տեղափոխման արգելքը մահափորձ է նրա նկատմամբ, որը հենց հիմա իրականացնում են բժիշկներն ու ու խաբեբա իշխանությունները, որոնք դա արտոնել են », – գրել է Յարմիշը Twitter- ում:
Յարմիշը նշել է, որ մինչ այդ բժիշկները Նավալնու տեղափոխման հետ կապված որևէ առարկություն չեն ունեցել և ասել են, որ պատրաստ են արտոնել նրա տեղափոխումը Գերմանիա։
«Այդ պատճառով էլ մենք կարճ ժամանակում կազմակերպեցինք ինքնաթիռը։ Հիմա, վերջին պահին բժիշկները չեն թույլատրում։ Իհարկե, այս որոշումը ոչ թե իրենք են կայացրել, այլ Կրեմլը»,- ասել է Յարմիշը։
Իր հերթին, Կոռուպցիայի դեմ պայքարի հիմնադրամի տնօրեն Իվան Ժդանովը, հղում անելով ոստիկանության աշխատակցին, հայտարարել է, որ Ալեքսեյի օրգանիզմում թույն կա, որը վտանգավոր է ոչ միայն նրա, այլև շրջապատի համար։ Բժիշկները սակայն այս հայտարարությանը չեն արձագանքել։