ՄԱԿ-ը կոչ է արել մանրակրկիտ հետաքննություն անցկացնել, եթե հաստատվի ընդդիմադիր քաղաքական գործիչ Ալեքսեյ Նավալնիի թունավորման մասին տեղեկատվությունը: Այս մասին հայտարարել է ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը:
Նրա խոսքով, միջազգային կազմակերպությունն անհանգստությամբ հետևում է Նավալնիի հանկարծակի հիվանդության մասին հաղորդումներին: Դյուժարիկը նշել է, որ քաղաքական գործչի հնարավոր թունավորման վերաբերյալ ցանկացած կասկած պետք է ամբողջությամբ հետաքննվի: Նա հավելել է, որ ՄԱԿ-ի անունից ընդդիմադիր գործիչին արագ ապաքինում է մաղթում:
Ավելի վաղ, Օմսկի շտապօգնության թիվ 1 կայանի հիվանդանոցի գլխավոր բժշկի տեղակալ Անատոլի Կալինիչենկոն ասել էր, որ բժիշկները դեռևս վերջնական ախտորոշում չեն կատարել: Այնուամենայնիվ, նրանք արդեն բացառել են ինսուլտը, սրտի կաթվածը և վարակները, այդ թվում՝ կորոնավիրուսային, որի ախտանիշները Նավալնիի մոտ չեն հայտնաբերվել:
Նավալնիի ինքնազգացողությունը վատացել է օգոստոսի 20-ի առավոտյան՝ Տոմսկից Մոսկվա թռիչքի ժամանակ:
Օդանավը շտապ վայրէջք է կատարել Օմսկում, որտեղ նրան շտապօգնության մեքենայով տեղափոխել են վերակենդանացման բաժանմունք: Նախնական ախտորոշումը «անհայտ հոգեոդիսլեպտիկ դեղամիջոցով թունավորումն է»: Նավալնիի մամուլի քարտուղարը պնդում է, որ մեկնման օրը նա ոչինչ չի կերել և միայն թեյ է խմել Տոմսկի օդանավակայանում գտնվող սրճարանում: Կրեմլը հավաստիացրել է, որ անհրաժեշտության դեպքում Նավալնին կկարողանա բուժման մեկնել արտասահման:
