Վիրուսային հեպատիտով վարակված է աշխարհի մոտ 2 միլիարդ բնակիչ: Այսպիսի տվյալներ է հրապարակել Առողջապահության համաշխարհային կազմակերպությունը (ԱՀԿ) հեպատիտի դեմ պայքարի միջազգային օրվա նախօրեին, որն առաջին անգամ նշվում է այսօր: Այս մասին հաղորդում է Gacther կայքը:
ԱՀԿ տվյալներով՝ հեպատիտից ամեն տարի մահանում է մոտ մեկ միլիոն մարդ: Մեծ է հեպատիտ B-ի տեսակարար կշիռը, որի կրող են համարվում աշխարհում մոտ 2 միլիարդ մարդ: Հեպատիտ B-ի տարածմանը նպաստում է այն, որ այն փոխանցվում է արյան միջոցով, այդ թվում՝ ներարգանդային զարգացման փուլում, ինչպես նաև ներարկիչների և վիրահատական գործիքների միջոցով:
ԱՀԿ զեկույցում նշվում է, որ այս վիրուսով հիվանդները երբեմն չեն էլ իմանում, որ իրենք հիվանդ են: Այդ պատճառով կազմակերպության անդամ երկրներին կոչ է արվել մեծ ուշադրություն դարձնել վիրուսային հեպատիտի ախտորոշմանը:
