Բազմիցս առաջ է քաշվում արդարության վերականգնման հարցը: Դատաիրավական համակարգի խնդիրներ, ոտնահարված իրավունքներ, բնապահպանական խնդիրներ…, հազար ու մի հարց էր կուտակվել տարիների ընթացքում, և հիմա, երբ ռեֆորմներ չեն իրականացվում կամ դանդաղ են իրականացվում և երբ առաջանում են խնդրահարույց հարցեր, դրանք դիտարկվում են ոչ միայն քաղաքական կամ բարոյական, այլ նաև արդարության վերականգնման տիրույթում: Մարդկանց հեղափոխության մղեց նաև արդարության վերականգնման պահանջը: Արդեն կա՞ն արդյոք ձեռքբերումներ, թե՞ ոչ:
Թեմայի շուրջ «Առաջին լրատվական»-ի հետ զրույցում «Քաղաքացու որոշում» կուսակցության անդամ, կրթության փորձագետ Արեգ Թադևոսյանը նշեց, որ ձեռքբերումներ, անշուշտ, կան, և շատ մարդիկ ակնհայտորեն տեսնում են, որ իրենց կյանքում փոփոխություններ են տեղի ունենում. «Սակայն արդարության վերականգնման տեմպերը դանդաղ են, իհարկե պետք է հասկանանք, որ բավականին ծանր պայմաններում է դա տեղի ունենում»:
Կրթության փորձագետի խոսքով՝ հեղափոխական պրոցեսների սկիզբը դիտարկելով, կարող ենք ասել, որ ամենակարևոր հանագամանքներից մեկը ժողովուրդի վիրավորվածությունն էր նրանից, որ այն, ինչ կատարվել է տարիներ շարունակ, արադար չի եղել… «Երբ հայտնվում ես կառավարության ղեկին, արդարության դրոշակը չես կարող փաթաթել և գզրոցի մեջ դնել, բայց նաև չես կարող միայն արդարության դրոշակի տակ աշխատել, քանի որ բազմաթիվ այլ դրոշակներ կան, որոնք նույնպես պարտավոր ես հաշվի առնել… Այնուամենայնիվ, չի կարելի խարխլել արդարության ու ճշմարտության, սիրո, կարեկցանքի և բարոյականության հիմնասյուները…»:
Մեր զրուցակցի դիտարկմամբ՝ շատերը մանիպուլյացիաներով են ստրատեգիաներ կառուցում. «Մի քանի հոգի կան, որոնք երբ ասում են, որ սիրում են ժողովրդին, հավատում եմ, նրանցից մեկը Նիկոլ Փաշինյանն է, ես դեռ հավատում եմ նրան, բայց շատերը դա անում են որպես ցինիկ քայլ՝ առանց հարգանք ու սեր զգալու մեր լավ ժողովրդի նկատմամբ և դա օգտագործում են որպես մանիպուլյացիոն մեթոդ»: Արեգ Թադևոսյանը նաև հավելեց, որ կառավարման «գոլ վիճակն» ընդունելի չէ:
«Սխալվելու և սխալն ընդունելու վախ. սա է մեր իշխանության առաջնային խնդիրը»- ընդգծեց Արեգ Թադևոսյանը:
Մանրամասն՝ տեսանյութում:
