Նկարիչ Հենրի Գարուկյանը «Առաջին լրատվականի» հետ զրույցում, խոսելով հեռուստաեթերից մատուցվող հեռուստահաղորդումների մասին, ասաց, որ իրեն ոչ միայն չի գոհացնում հայկական հեռուստաեթերը, այլև այն դիտելը «վնասակար է առողջությանը»:
«Ուզում եմ գտնել մի որևէ բան, որը կկարողանամ հաճույքով նայել, բայց չեմ գտնում: Բոլոր չափանիշները տանում են դեպի անկում, անդունդ են իջեցնում»,- ասաց նկարիչը՝ նշելով, որ անգամ չի կարողանում նայել լուրերը, քանի որ կորել է դրանց նկատմամբ վստահությունը:
Նրա խոսքով՝ այդ հեռուստտեսությանը ներկայում փոխարինում են ինտերնաետային լրատվամիջոցներն ու հաղորդաշարերը:
«Հայկական եթերն արտասվելու չափ այլանդակված է: Կարելի՞ է այսքան բան ունենալ և միաժամանակ ոչինչ չունենալ»,- ցավով ասաց Հ.Գարուկյանը՝ ավելացնելով, որ ստիպված է այս խոսքերն ասել, քանի որ հեռուստատեսությամբ, բացի էժանագին հաղորդումներից, այլ բան չեն ցուցադրում:
«Ամենալավ, ամենանվիրական երևույթի մասին խոսվում է շատ վատ, այն վատ է ներկայացվում: Միայն շախմատով ոչինչ դուրս չի գա: Մի ծաղկով գարուն չի գա»,- եզրափակեց իր խոսքը նկարիչը:
