Հեռահաղորդակցության միջազգային միությունը (ՀՄՄ) ներկայում չափորոշիչներ է մշակում ինտերնետի համար, որոնցով հնարավոր կլինի համեմատել երկրներն՝ ըստ համացանցից օգտվողների թվի: «Առաջին լրատվականի» հետ զրույցում «Ինտերնետ հանրություն» ՀԿ փոխնախագահ Գրիգոր Սաղյանը հայտնեց, որ հարևան երկրների տեղեկատվությունը հստակ չէ:
«ՀՄՄ-ում փորձում են հասկանալ, թե ֆիքսված, մոբիլ, լայնաշերտ ինտերնետի չափանիշները որոնք են: Այդ առումով ցանկացած համեմատություն հարևան երկրների հետ բերում է անհամաչափ սխալների, քանի որ նույն չափման միավորը չենք օգտագործում»,- ասաց Գ.Սաղյանը:
Ընդհանուր մակարդակի մասին խոսելով՝ Գ.Սաղյանը նշեց, որ մինչև 2005 թ. ՀՀ-ում մենաշնորհային կարգավիճակով գործող օպերատորը մի քանի տարով ետ է գցել երկիրը, քանի որ ինտերնետը չէր զարգացնում, մնացածներն էլ հնարավորություն չունեին զարգացնելու: Գ.Սաղյանի կարծիքով, ինտերնետի օգտագործման առումով Ռուսաստանի համեմատ ՀՀ-ն շատ հետ է, այնտեղ զարգացել է ոչ միայն լարային տնտեսությունը, այլև տեղի է ունեցել տեղեկատվական ռեսուրսների աճ, առաջացել է բովանդակության հսկայական պաշար, որը ՀՀ-ում բավարար վիճակում չէ: Թուրքիան անհամամետաելի առաջ է: Վրաստանը պատվիրում է ինտերնետի 100 Գբիթ/վրկ արագագործություն, այն դեպքում երբ Հայաստանը՝ միայն 18 Գբիթ/վրկ, սակայն Վրաստանի բնակչությունն ավելին է, և դեռ հայտնի չէ, թե մեր 18 Գբիթ/վրկ-ը այդ 100 Գբիթ/վրկ-ի մեջ մտնում է, թե ոչ:
«Ինչ-որ գնահատականներ քաղաքական գործիչներն օգտագործում են ինտերնետի տարածվածությունը որպես կառավարության արդյունավետ աշխատանքի արդյունք ցույց տալու համար, այնպես որ շատ դեռպքերում այդ թվերն այն թվերն են, որ ցանկալի էր ունենալ»,- նկատեց Գ.Սաղյանը:
Ներկայում ՀՀ-ում համացանցից օգտվողների հաշվարկը կատարվում է «Արմենտել» ընկերության հայտարարության հիման վրա, որն ունի 100 հզ. բաժանորդ, նաև՝ circle.am-ը վարում է վիճակագրություն, թե ով է միանում իրենց տարբեր ցանցերից: Ըստ այդմ՝ «Արմենտելից» օգտվողների թիվը circle.am-ում 50% է, ընդհանուրը ստացվում է 200 հզ. օգտվող: Սա միայն լայնաշերտ ինտերնետից օգտվողներն են՝ կարելի է ասել տնտեսություններ, քանի որ Hi-line-ը միացվում է բնակարանին, որտեղ օգտվողների թիվը 1-ից ավելի է:
Սա վերաբերում է միայն լայնաշերտ (առնվազն 256 կբիտ/վրկ-ից արագագործ կապը) ինտերնետին, քանի որ ըստ Գ.Սաղյանի, համացանցին միանալու հնարավորություն ունեն նաև բջջային հեռախոս ունեցողները. 3 հեռահաղորդակցային ընկերություններն ունեն 3 մլն բաժանորդ, բայց չենք կարող ասել, որ դրանց որ մասն է միանում ինտերնետին: