Լիբանանի գլխավոր խնդիրը «Հըզբոլլահ» խմբավորման առաջնորդ Հասան Նասրուլլան է: Այդ մասին արտաքին գործերի և պաշտանության կոմիտեի նիստում հայտարարել է Իսրայելի պաշտպանության նախարար և փոխարինող վարչապետ Բենի Գանցը: «Ճիշտ է, Նասրուլլան մեր մեծ թշնամին է հյուսիսային ճակատում, բայց Լիբանանի համար երկրի ներսում ամենամեծ խնդիրները նա է հարուցում: Մենք տեսնում ենք Լիբանանի ողբերգությունը: Իսրայել պետությունն իր օգնությունն ու աջակցությունն է առաջարկել»,- Գանցի հայտարարությունը մեջբերում է նրա մամուլի ծառայությունը:
«Մտածեք, թե ինչ կլինի, եթե նույն բանը կատարվի լիբանանյան գյուղերում պահվող իրանական զենքի հետ: Լիբանանում մեկ տանիքի տակ և՛ հյուրատներ կան, և՛ զինապահեստներ։ Եթե պահեստը պայթի, հյուրատներն էլ կփլվեն, և Լիբանանի հասարակությունը չափազանց մեծ գին կվճարի: Որպես ռազմական գերատեսչություն, մենք բախվում ենք թշնամիների հետ, որոնք զենքը պահում են հանրային տարածքներում: Եթե, բացի կռվելուց այլընտրանք չունենանք, հետևանքները ծանր կլինեն»,-հավելել է Գանցը:
Անցած շաբաթ «Հըզբոլլահ»-ի գլխավոր քարտուղար Հասան Նասրուլլան հեռուստաուղերձում հայտարարել էր, որ Բեյրութի նավահանգստում «Հըզբոլլահին» պատկանող զենքի առկայության մասին լուրերը չեն համապատասխանում իրականությանը. դրանք կոչված են ողբերգությունը քաղաքականացնելու համար, հաղորդել է «ՌԻԱ Նովոստին»:
