ՀՀ փոխվարչապետ, տարածքային կառավարման նախարար Արմեն Գևորգյանն այսօր այցելեց Կոտայքի մարզ` մարզի առաջնահերթ խնդիրների լուծման, ինչպես նաև «Հազարամյակի մարտահրավեր հիմնադրամ-Հայաստան» ծրագրերի ընթացքին ծանոթանալու նպատակով: Փոխվարչապետին ուղեկցում էր Կոտայքի մարզպետ Կովալենկո Շահգալդյանը:
Մարզի առաջնահերթ խնդիրների լուծման ծրագրով Կոտայքի մարզին հատկացվել է 1 մլրդ 318 մլն դրամ, որով մարզում իրականացվում են շենքերի տանիքների, խմելու ջրի, ոռոգման համակարգերի, ճանապարհների, կրթական և նախակրթական հաստատությունների վերանորոգման, վերակառուցման աշխատանքներ:
Փոխվարչապետն այցելեց Զովունի, Նոր Գեղի, Քաղսի համայնքներ, ծանոթացավ համայնքների մանկապարտեզների վերանորոգման աշխատանքներին: Զովունու մանկապարտեզի վերանորոգման համար հատկացվել է շուրջ 45 մլն, Նոր Գեղիի մանկապարտեզի համար` շուրջ 37.5 մլն և Քաղսիի մանկապարտեզի համար` շուրջ 36 մլն դրամ: Ա. Գևորգյանին տեղեկացվեց, որ կատարված է աշխատանքների 70 տոկոսը, դրանք կավարտվեն նախատեսված ժամկետում` օգոստոսի 31-ին: Ա.Գևորգյանը կարևորեց նաև իրականացվող աշխատանքների որակի նկատմամբ համայնքների վերահսկողությունը` հաշվի առնելով, որ ծրագիրն իրականացվում է համայնքների ֆինանսավորմամբ:
Մարզի առաջնահերթ խնդիրների լուծման ծրագրով մարզում վերանորոգվում են նաև Բյուրեղավանի, Ակունքի, Քանաքեռավանի, Գառնիի մանկապարտեզները:
Փոխվարչապետը Նոր Գեղի համայնքում այցելեց նաև նոր կառուցվող եկեղեցու շինհրապարակ, տեղեկացավ կատարված աշխատանքների մասին:
Այնուհետև Ա.Գևորգյանը ծանոթացավ «ՀՄՀ-Հայաստան» ծրագրով Եղվարդի երրորդ կարգի ջրանցքի վերականգնման աշխատանքներին: Նախատեսված 7,942 մետր ջրանցքից ներկայումս կառուցված է 2,250 մետրը: Ծրագրի ավարտին ոռոգելի կդառնա համայնքի 514 հեկտար հողատարածք` ներկայիս 215-ի փոխարեն: Տեղեկացվեց, որ ջրանցքի վերականգնման աշխատանքները հնարավոր կլինի ավարտել սահմանված ժամկետում` մինչև օգոստոսի 31-ը:
Փոխվարչապետը Հրազդան քաղաքում ՀՀ ՏԿՆ ջրային տնտեսության պետական կոմիտեի նախագահ Ա. Անդրեասյանի, «Հայջրմուղկոյուղի» ՓԲ ընկերության գլխավոր տնօրեն Պատրիկ Լորենի ուղեկցությամբ ծանոթացավ նաև «Հրազդան քաղաքի ջրամատակարարման և ջրահեռացման համակարգերի բարելավման» ծրագրով իրականացվող քաղաքի խմելու ջրի ներքին ցանցի վերակառուցման աշխատանքներին:
Ծրագրով վերակառուցվում է քաղաքի խմելու ջրամատակարարման ցանցը: Ըստ հաշվարկների` աշխատանքների արդյունքում մինչև 2011 թ. ավարտը Հրազդանում կապահովվի միջինը 17-18 ժամյա ջրամատակարարում` ներկայիս 11 ժամի դիմաց, իսկ լրացուցիչ աշխատանքների իրականացումից հետո` մինչև 2012 թ. Ավարտը, միջինը 20-21 ժամյա ջրամատակարարում: Հրազդանի ջրամատակարարման համակարգի բարելավման ծրագիրն իրականացվում է ՀԲ-ի վարկային 5 մլն 611 հազար դոլար միջոցներով և նախատեսվում է ավարտել այս տարվա հոկտեմբերին: Ասիական բանկի 550 մլն դրամ վարկային միջոցներով վերազինվում է քաղաքը խմելու ջուր սնուցող պոմպակայանը, որի աշխատանքները նախատեսվում է ավարտել մինչև դեկտեմբեր:
Մարզպետարանում մարզպետ Կ. Շահգալդյանի, ՀՀ ՏԿՆ ջրային տնտեսության պետական կոմիտեի նախագահ Ա. Անդրեասյանի, «Հայջրմուղկոյուղի» ՓԲ ընկերության գլխավոր տնօրեն Պ. Լորենի, Հրազդանի քաղաքապետի , այլ պատասխանատուների մասնակցությամբ անցկացված խորհրդակցությանը Ա.Գևորգյանը քննարկեց «Հրազդան քաղաքի ջրամատակարարման և ջրահեռացման համակարգերի բարելավման», ինչպես նաև «Սևանա լճի բնապահապանական» ծրագրերի ընթացքին վերաբերող հարցեր:
Մասնավորապես, «Սևանա լճի բնապահպանական» ծրագրով Վարդենիս, Մարտունի, Գավառ քաղաքներում կկառուցվեն կեղտաջրերի մեխանիկական մաքրման կայաններ, ինչը զգալիորեն կնվազեցնի Սևանա լիճ և Հրազդան գետ թափվող կեղտաջրերի ծավալները: Ծրագիրը, որը ֆինանսավորվում է ԵԶՎԲ կողմից, և որի ընդհանուր արժեքն է շուրջ 3.9 մլն եվրո, կավարտվի մինչև դեկտեմբեր:
Ընդհանուր ծրագրի շրջանակում արդեն վերանորոգվել են Գավառ, Մարտունի, Վարդենիս և Սևան քաղաքների կոյուղագծերը: Սևանա լճի բնապահապանական ծրագիրն իրականացվում է ԵԶՎԲ-ի ֆինանսավորմամբ` 12 մլն եվրո ընդհանուր արժեքով, և նախատեսվում է ավարտել 2011 թ. վերջը: Խորհրդակցության ժամանակ տեղեկացվեց, որ երկու ծրագրերով էլ աշխատանքներն ընթանում են սահմանված ժամանակացույցով:
