«Սահմանադրական դատարանի մասին» օրենքում փոփոխությունները ուժի մեջ մտնելուց հետո սկսվել է Սահմանադրական դատարանի կազմը համալրելու գործընթացը, որի շուրջ, սակայն, աղմկոտ քննարկումներ են ծավալվում։
Դատավորների ընդհանուր ժողովը Երվանդ Խունդկարյանին ընտրել է Սահմանադրական դատարանի դատավորի թեկնածու։ Ավելի վաղ կառավարությունը ՍԴ դատավորի թեկնածու էր առաջադրել Վճռաբեկ դատարանի քրեական պալատի նախկին նախագահ Դավիթ Ավետիսյանի որդուն՝ Վահրամ Ավետիսյանին։ Ինչպե՞ս եք գնահատում այս թեկնածուներին, և արդյոք նրանք կարո՞ղ են իրականացնել այն փոփոխությունները, որոնք ի սկզբանե դրված էին ՍԴ ճգնաժամի հաղթահարման հիմքում․ «Առաջին լրատվական»-ի հարցին ԱԺ անկախ պատգամավոր Արման Բաբաջանյանը պատասխանեց․ «Ամենասկզբում կցանկանայի մի քանի սկզբունքային արձանագրում կատարել։ Նախ՝ որը գուցե ամենակարևորն է՝ ՍԴ դատավորի թեկնածու առաջադրելով, դատական համակարգը ճանաչեց սահմանադրական փոփոխությունների ամբողջ գործընթացի սահմանադրականությունը։ Սա պատասխան է բոլոր նրանց, այդ թվում՝ խորհրդարանական, արտախորհրդարանական ուժերին, որոնք հայտարարում էին ու շարունակում են հայտարարել, որ սահմանադրական ճգնաժամի հաղթահարմանն ուղղված ողջ գործընթացը հակասահմանադրական է։ Դատական համակարգը, ըստ էության, շաբաթ օրը կատարած իր ընտրությամբ հողին հավասարեցրեց բոլոր այդ պնդումները և, որպես կարևորագույն ինստիտուտ, ճանաչեց այս գործընթացի սահմանադրականությունը։ Սա տեղի ունեցածի, ըստ էության, համակարգային, ինստիտուցիոնալ ասպեկտն է, որը չափազանց կարևոր և էական է։
Ինչ վերաբերում է Երվանդ Խունդկարյանի թեկնածությանը՝ այդ առումով ևս կան քննարկելի, վերապահելի որոշ հանգամանքներ։ Նախ՝ մամուլում տեղեկություններ են հայտնվել, որ Դատավորների ընդհանուր ժողովում տեղի ունեցած ամբողջ ընտրական գործընթացն անցել է կեղծիքներով՝ ընտրող դատավորների և քվեատուփերում առկա քվեաթերթիկների միջև եղել է քվեների էական տարբերություն։ Այդ տեղեկությունները մինչ այս պահը չեն հերքվել և նույնիսկ չեն էլ հաստատվել։ Սակայն, եթե վերջնարդյունքում հաստատվի, որ Դատավորների ընդհանուր ժողովում տեղի ունեցած ընտրական ամբողջ գործընթացն անցել է կեղծիքներով, ապա դա ամբողջությամբ կապալեգիտիմացնի այդ ընտրությունը, և Սահմանադրական դատարանի նոր դատավորներից առնվազը մեկը կլինի ոչ լեգիտիմ։ Դա չի կարող անհետևանք մնալ»։
