Վարչապետ Նիկոլ Փաշինյանը մեկ ամիս առաջ հանդիպում էր ունեցել տարբեր տարիներին բանակում խաղաղ պայմաններում զոհված զինծառայողների ծնողների հետ՝ քննարկելու այլընտրանքային քննչական խմբի ձևավորման աշխատանքների մանրամասները։
Աշխատակարգով նախատեսվում է ձևավորել աշխատանքային խումբ, որը կուսումնասիրի ընդհանուր առմամբ 8 քրեական գործ, յուրաքանչյուր գործով առանձին հանդիպում կլինի զոհված զինծառայողի իրավահաջորդի հետ, և առկա նյութերի համալիր ուսումնասիրության արդյունքում խորհրդատվական եզրակացություն կներկայացվի վարչապետին: Վերջնական հստակեցվել է փաստաբանական խմբի կազմը, նրանց վճարման կարգը և մնացած մանրամասները։ Մեկ ամսից ավելի է, սակայն, որևէ նորություն չկա քննվող որևէ քրեական գործի մասին։
«Առաջին լրատվական»-ի հետ զրույցում 2010 թվականի դեկտեմբերի 17-ին Հադրութում տեղի ունեցած միջադեպի ժամանակ զոհված զինծառայող, հետախույզ Արթուր Ղազարյանի մայրը՝ տիկին Իրինա Ղազարյանն ասաց, որ այս պահին որևէ նոր բան չկա։ Տիկին Իրինայի փոխանցմամբ՝ հավանաբար, երեքշաբթի կամ չորեքշաբթի օրը վերջնական որոշումը կլինի։
«Մեկ շաբաթ էլ սպասենք, տեսնենք՝ ինչ կլինի։ Այս պահին դեռ որևէ նորություն չկա։ Իրենց ասելով՝ երեքշաբթի կամ չորեքշաբթի վերջնական որոշումը կլինի՝ փաստաբանների գումարների վճարման ու մնացած հարցերի հետ կապված»,- փոխանցեց սպանված զինվորի մայրը։
Բանակում խաղաղ պայմաններում սպանված զինվորների ծնողները համաձայնության են եկել, որ առաջին քննվող քրեական գործը լինի 2007թ. օգոստոսի 30-ին Գեղարքունիքի մարզի Կարճաղբյուր գյուղում տեղակայված 28418 զորամասում գազանաբար սպանված կրտսեր սերժանտ Տիգրան Օհանջանյանի գործը։ Տիգրան Օհանջանյանի ընտանիքը ՌԴ-ից էր հայրենադարձվել։
Տիկին Իրինան մեզ հետ զրույցում ասաց՝ քանի որ Տիգրան Օհանջանյանի քրգործն արդեն 13 տարի է տեղից չի շարժվում։ Դրան զուգահեռ քննվելու է նաև երկու տարի առաջ մայիսին «Մեհրաբ» զորամասում գլխի շրջանում ստացած մահացու հրազենային գնդակային վիրավորումից մահացած ժամկետային զինծառայող Լևոն Թորոսյանի գործը։
Ըստ քննչականի՝ տղան ինքնասպան է եղել, սակայն մայրը չի հավատում այդ վարկածին։ «Սպանել են իմ որդուն՝ դաժանաբար սեռական օրգաններին հարվածելով, կանգնած է եղել հայրը դիահերձարանում, և դատաբժիշկը արձանագրել ա երեխայի վրա բռնության հետքերը»,- ասում է զինվորի մայրը՝ Արմենուհի Պողոսյանը։ Մայրը տարբեր լրատվականներին տված հարցազրույցում նշել է, որ որդին հիասթափված է եղել այդ զորամասից ու ցանկացել է փոխել զորամասը, սակայն ինքը խորհուրդ չի տվել, ինչի համար այսօր զղջում է։
Իրինա Ղազարյանը ասաց, որ եթե Տիգրան Օհանջանյանի գործի պարագայում պնդում են, թե տարիներ են անցել, իրեղեն ապացույցներ չկան, ապա Լևոն Թորոսյանի գործը երկու տարվա պատմություն ունի, տղային դաժանաբար սպանել են։ «Հիմա տեսնենք, սա էլ հո երկու տարվա գործ է, ի՞նչ են ասելու»,- նշեց սպանված զինվորի մայրը։
Լուսանկարը՝ panorama.am-ի
