2020 թվականի հուլիսի 21-ին, ժամը 22-ի սահմաններում ՀՀ ԱՆ «Արթիկ» քրեակատարողական հիմնարկի հերթապահ մասի պատասխանատու հերթապահի օգնականի կողմից զեկուցագիր է ստացվել, որ նույն օրը, ժամը 20-ն անց 30-ին սահմանված կարգի համաձայն՝ քրեակատարողական հիմնարկի երկու աշխատակիցների հետ բացել են խցի դուռը՝ ներքին կանոնակարգի խախտման պատճառով պատժախցային և կարանտինային բաժանմունքի խցում գտնվող դատապարտյալին հասանելիք անկողնային պարագաները հանձնելու նպատակով:
Դատապարտյալը, մոտենալով խցի դռանը, նշված պարագաները վերցնելու պահին ձեռքին եղած մեկանգամյա սափրիչի ածելիով անսպասելիորեն վնասվածք է պատճառել ՔԿ հիմնարկի աշխատակիցներից մեկի ձախ թիակի հետին հատվածին:
Մյուս աշխատակիցը դատապարտյալին վնասազերծելու նպատակով փորձել է վերցնել ածելին, սակայն դատապարտյալը նույն ածելիով վնասվածքներ է պատճառել նրա դեմքի և պարանոցի հատվածներում:
Դատապարտյալը նույն ածելիով նաև ինքնավնասում է կատարել:
Միջադեպը դադարեցվել է: Վնասվածքներ ստացածներին օգնություն է ցուցաբերվել:
Դեպքի առթիվ ՀՀ քննչական կոմիտեի Շիրակի մարզային քննչական վարչության Արթիկի և Անիի քննչական բաժնում ՀՀ քրեական օրենսգրքի 316 հոդվածի (Իշխանության ներկայացուցչի նկատմամբ բռնություն գործադրելը) 2-րդ մասով հարուցվել է քրեական գործ: Ըստ ՀՀ քննչական կոմիտեի պաշտոնական հաղորդագրության՝ «Արթիկ» քրեակատարողական հիմնարկի՝ վնասվածքներ ստացած երկու աշխատակիցները ճանաչվել են տուժող և ցուցմունք են տվել դեպքի վերաբերյալ:
ՀՀ քննչական կոմիտեի Շիրակի մարզային քննչական վարչության Արթիկի և Անիի քննչական բաժնում քննություն է տարվում՝ դատապարտյալի կողմից «Արթիկ» քրեակատարողական հիմնարկի աշխատակիցների նկատմամբ բռնություն գործադրելու դեպքի բոլոր հանգամանքները պարզելու ուղղությամբ:
Նախաքննության ընթացքում կատարվել են քննչական գործողություններ՝ դեպքի վայրի զննություն, առգրավումներ, հարցաքննություններ:
Քրեական գործով էական նշանակություն ունեցող հանգամանքները, ՔԿՀ աշխատակիցներին հասցված վնասվածքների ծանրության աստիճանը պարզելու նպատակով նշանակվել է դատաբժշկական փորձաքննություն:
ՀՀ ԱՆ «Արթիկ» քրեակատարողական հիմնարկը հանցագործության գործիք հանդիսացող ածելին փոխանցել է վարույթն իրականացնող մարմնին:
Ըստ ՀՀ քննչական կոմիտեի հաղորդագրության՝ ձեռնարկվում են միջոցառումներ՝ դեպքի բոլոր հանգամանքները պարզելու, օբյեկտիվ, լրիվ և բազմակողմանի քննություն ապահովելու ուղղությամբ:
Նախաքննությունը շարունակվում է:
