Մոսկվայում ադրբեջանցիների զանգվածային, թիրախային հարձակումներ են տեղի ունեցել ռուսաստանաբնակ հայերի վրա: Ադրբեջանցիների շարքերից կան ձերբակալվածներ: Կարևորն այն է, թե ովքեր են այս ապակայունության պատվիրողներն ու հրահրողները:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացու որոշում» կուսակցության անդամ Հայկ Սահակյանը, «Օրբելի» կենտրոնի փորձագետ Նարեկ Սարգսյանը և վերլուծաբան Հայկ Խալաթյանը:
Նարեկ Մինասյանը, անդրադառնալով դիտարկմանը, որ ամենայն հավանականությամբ ապակայունացման պատվիրատուն Բաքուն է, որը սահմանային լարվածությունը փորձում է տեղափոխել այլ տարածք և էթնիկ բախումներ է առաջանցում, նշեց, որ Բաքվի նպատակները տարբեր կարող են լինել: «Հայերի խաղաղ ակցիաների հիմնական նպատակներից մեկը տվյալ երկրում հանրության իրազեկվածության բարձրացումն է և քաղաքական ճնշում գործադրելը այդ երկրի իշխանությունների վրա: Բայց չի բացառվում, որ Ադրբեջանից կա ազդակ, որ հնարավորինս ստվերեն հայերի կողմից կազմակերպվող ակցիաները, սադրանքներ հրահրեն և տապալեն այդ գործընթացը, քանի որ երբ խաղաղ ակցիաները վերաճում են բախումների, արդեն տվյալ երկրի հասարակության վերաբերմունքը բացասական է լինում»:
«Տարբեր երկրներում այս բախումների հիմնական շահառուն ադրբեջանցիներն են: Իմ կարծիքով՝ հրամաններ են գնում Բաքվից, բացի դրանից՝ Ադրբեջանում արդեն որերորդ սերունդն է, որը հայերին ընկալում է որպես թշնամի, եթե նախկինում Ռուսաստանում կամ այլ երկրներում հայերն ու ադրբեջանցիները նույնիսկ համագործակցում էին, ապա նոր սերունդը չի ուզում խաղալ ձևավորված խաղի կանոններով, ուզում է այլ երկրներում էլ պայքարել հայերի դեմ, և պատրաստ է կատարել լարվածություն ստեղծելու վերաբերյալ Բաքվից եկած հրամանները»,- նշեց Հայկ Խալաթյանը:
Հայկ Սահակյանը նշեց, որի չի կիսում այն կարծիքը, թե Բաքուն է ազգամիջյան բախումների պատվիրատուն, քանի որ բախումների դեպքում ադրբեջանցիներն են հայտնվում ռուսական իշխանությունների և հայերի թիրախում: «Ադրբեջանին ձեռնտու չէ, որ Մոսկվայում ադրբեջանական գործոնը թուլանա: Հայերի և ադրբեջանցիների բախումներն ավելի շատ ռուսական ազդեցության հետևանք են»,- նշեց Հայկ Սահակյանը:
Քննարկման ընթացքում հնչեց նաև կարծիք, որ ստեղծված իրավիճակը կարող է սպիրալաձև լարվել:
Մանրամասն՝ տեսանյութում:
