Ազգային ժողովի շենքի մոտ են հավաքվել Թուրքիայում աշխատած և կառավարության հորդորին անսալով Հայաստան վերադարձած կանայք՝ բողոքի ձայն բարձրացնելու և ԱԺ «Իմ քայլը» խմբակցության պատգամավոր Սիսակ Գաբրիելյանին ներկայացնելու իրենց խնդիրը: Նրանց խոսքով՝ թեև իրենց վստահեցրել են, որ իրենց ուղարկած և տարիների քրտինքով վաստակած ապրանքը կարող են ստանալ առանց գումար վճարելու, այսինքն՝ առանց մաքսազերծման, սակայն այսօր նրանք կանգնել են փաստի առաջ:
«Թուրքիայից վերադառնալուց հետո երկու շաբաթ մնացել ենք կարանտինի մեջ, իսկ երկու շաբաթը լրանալուց հետո արդեն երկու ամիս է՝ մենք չենք կարողանում մեր իրերը ստանալ. դիմում ենք մաքսատուն, պատասխանում են՝ պետք է ներկայացնեք Թուրքիայում ձեր կացության ձևը, այսինքն՝ այնտեղ մնալու իրավունք՝ վիզա, որը մեզ անհրաժեշտ չի եղել»,- «Առաջին լրատվական»-ին մանրամասներ ներկայացրեց կանանցից մեկը:
Նրանցից մեկն էլ նշեց, որ վիզա ստանալու համար պետք է ապրածդ տարիների պարտքը ամբողջովին վճարես. «Եթե, ասենք, բնակվել ես 5 տարի և ավելի, դա քիչ գումար չի կազմում՝ խոսքը մոտավորապես 5-6 հազար դոլարի մասին է: Ես Թուրքիայում ապրել եմ 15 տարի, և իմ անձնագիրը անվավեր է 2007 թվականից: Այսինքն՝ ես այդ անձնագրով ոչինչ անել չեմ կարող: Հիմա ինձ պարտադրում են թուղթ բերել, որտեղի՞ց բերեմ, այ ընկեր: Սա աբսուրդ է»:
Նրանք նշեցին, որ այսօր այս խնդրի առաջ կանգնած է 20 մարդ:
Մանրամասն՝ տեսանյութում:
