Չինաստանի իշխանությունները Միացյալ Նահանգներից պահանջել են փակել ԱՄՆ-ի գլխավոր հյուպատոսությունը Չենդու քաղաքում (Սիչուանի նահանգ, հարավարևմտյան Չինաստան): Այդ մասին ասված է ՉԺՀ-ի արտաքին գործերի նախարարության՝ հուլիսի 24-ին հրապարակված հայտարարության մեջ:
«Հուլիսի 24-ի առավոտյան Չինաստանի արտաքին գործերի նախարարությունը ՉԺՀ-ում ԱՄՆ-ի դեսպանությանը տեղեկացրել է Չենդուում Միացյալ Նահանգների գլխավոր հյուպատոսություն հիմնելու և գործունեություն վարելու թույլատրագիրը հետ կանչելու՝ իր որոշման մասին:
Նախարարությունը նաև (Չենդուում ԱՄՆ-ի) գլխավոր հյուպատոսությանն առաջադրել է ամբողջ գործունեության և միջոցառումների դադարեցման կոնկրետ պահանջներ»,- ասված է ՉԺՀ-ի արտգործնախարարության կայքում հրապարակված հայտարարության մեջ:
Փաստաղթում ընդգծված է, որ հուլիսի 21-ին ԱՄՆ-ը «միակողմանի կարգով ձեռնարկել է սադրանք», Չինաստանից «խստորեն պահանջելով» փակել Հյուսթոնում ՉԺՀ-ի գլխավոր հյուպատոսությունը»: «ԱՄՆ-ի այդ քայլը միջազգային իրավունքի նորմաների, միջազգային հարաբերությունների հանգուցային սկզբունքների և Չինաստանի ու ԱՄՆ-ի միջև հյուպատոսական համաձայնագրի լուրջ խախտում է»,- նշված է հաղորդագրոթյան մեջ: Չինաստանի պահանջն ԱՄՆ-ից փակելու Չենդուում Միացյալ Նահանգների գլխավոր հյուպատոսությունն անհրաժեշտ է և օրինական, ՉԺՀ-ի գործողությունները համապատասխանում են միջազգային իրավունքի նորմաներին, ասված է հայտարարության մեջ՝ հաղորդել է ՏԱՍՍ-ը:
