Ադրբեջանի արտաքին գործերի նախարարության մամուլի խոսնակ Լեյլա Աբդուլաևան ասել է, որ երեկ Լոս Անջելեսում տեղի ունեցած ցույցի ժամանակ յոթ ադրբեջանցիներ են վիրավորվել: «Ռադիկալ հայ դաշնակցականները բռնություն և ագրեսիա են կիրառել ադրբեջանցի խաղաղ ցուցարարների դեմ, և նույնիսկ Լոս Անջելեսի ոստիկանությունը, որը պատասխանատու է անվտանգության ապահովման համար, չի կարողացել կանխել նրանց վանդալիզմը: Հայերը հարձակվել են ադրբեջանցի ցուցարարների վրա ՝ վիրավորելով յոթ մարդու, այդ թվում ՝ կնոջ»,-ասել է խոսնակը:
Ավելի վաղ Լոս Անջելեսում Ադրբեջանի հյուպատոսությունը Ֆեյսբուքի պաշտոնական էջում գրել էր, որ վիրավորներից չորսին հոսպիտալացրել են՝ հրապարակելով լուսանկարներ:
Կատարվածի առնչությամբ Լոս Անջելեսում ՀՀ գլխավոր հյուպատոսությունը հայտարարությամբ է հանդես եկել՝ խստորեն դատապարտելով ադրբեջանական կողմի սադրանքները:
Հայտարարության մեջ ասվում է. «Լոս Անջելեսում ՀՀ գլխավոր հյուպատոսությունը խստորեն դատապարտում է ադրբեջանցիների սադրանքները Ադրբեջանի հյուպատոսության դիմաց: Հաշվի առնելով իրադարձությունների հաջորդականությունը՝ ակնհայտ է, որ հայ համայնքի խաղաղ բողոքի ցույցը խափանելը նախապես պլանավորված էր և կազմակերպված բնույթ ունեցավ:
Լոս Անջելեսում ՀՀ գլխավոր հյուպատոսությունն անընդունելի է համարում է խաղաղ ցուցարաների դեմ բռնությունները»:
Ադրբեջանի ԱԳՆ խոսնակի փոխանցմամբ՝ տեղի ունեցածի կապակցությամբ ԱՄՆ-ում Ադրբեջանի դեսպանը հրավիրվել է արտգործ նախարարություն:
Լեյլա Աբդուլաևան, մասնավորապես, նշել է, որ Լոս Անջելոսում Ադրբեջանի հյուպատոսարանի դիմաց հավաքված ադրբեջանցիները, ովքեր մի քանի անգամ ավելի քիչ էին հայերից, խաղաղ ցույցով հակադարձում էին հայ ցուցարարներին:
