Ֆիլիպինների նախագահ Ռոդրիգո Դուտերտեն սպառնացել է կալանավորել նրանց, ովքեր կորոնավիրուսից պաշտպանող դիմակ չեն կրում: Հուլիսի 21-ին այդ մասին հաղորդել է Reuters գործակալությունը:
«Մենք կասկած չունենք նրանց կալանավորման անհրաժեշտության հարցում, ովքեր համավարակի պայմաններում դիմակ չեն կրում եւ անվտանգ հեռավորություն չեն պահպանում: Դա լուրջ հանցագործություն է: Թող նրանց կալանավորումը լավ դաս ծառայի մնացածների համար»,- հայտարարել է Ֆիլիպինների պետության ղեկավարը:
Անցյալ շաբաթ իշխանությունները հայտնել են, որ անհրաժեշտության դեպքում կորոնավիրուսի հարուցած թեթեւ տեսակի թոքաբորբով հիվանդներին տներից բռնությամբ կտեղափոխեն հիվանդանոցներ, չնայած դրանով իսկ մարդու իրավունքների խախտման մեղադրանքներին:
Խիստ միջոցների անհրաժեշտությունը պետական պաշտոնյաները բացատրել են ախտահարվածների եւ վարակից մահացածների թվի կտրուկ աճով այն բանից հետո, երբ հունիսին Ֆիլիպիններում մեղմացվել Էր կարանտինային ռեժիմը:
Այսօրվա դրությամբ համավարակից մահացածների թվով Ֆիլիպինները Հարավ – արեւելյան Ասիայում զբաղեցնում են երկրորդ տեղը Ինդոնեզիայից հետո: Հունիսից ախտահարված ֆիլիպինցիների թիվը քառապատիկ ավելացել է եւ հասել 68 898-ի: Անցյալ ամսվանից մահացածների քանակը կրկնակի աճել է՝ մինչեւ 1 835, հաղորդել է ՏԱՍՍ-ը:
