Ամստերդամի իշխանությունները կուտակումների պատճառով մի քանի փողոց են փակել հայտնի կարմիր լապտերների թաղամասի հարևանությամբ և կոչ են արել չայցելել այդ շրջան: Այս մասին հաղորդում է «Եվրոպեյսկայա պրավդա»-ն՝ հղում անելով DPA գործակալությանը:
Նախքան հայտարարությունը, սոցիալական հեռավորության պահանջները բավարարելու համար քաղաքի այս շրջանում միակողմանի երթևեկություն է մտցվել և խիստ վերահսկվել է այցելուների հոսքը:
Նիդեռլանդներում սեքս-աշխատողներն իրենց գործունեությունը վերսկսել են հուլիսի 1-ից: Նրանցից շատերն աշխատում են կարմիր լապտերների թաղամասում:
Զբոսաշրջային հայտնի ուղղություն համարվող Ամստերդամում վերջին շաբաթվա ընթացքում զբոսաշրջիկների մեծ ներհոսք է գրանցվել՝ կորոնավիրուսային սահմանափակումների չեղարկումից և եվրոպական տարբեր երկրների սահմանների բացումից հետո: