Ճապոնիայի կառավարությունը մտաիդր չէ կրկին արտակարգ դրության ռեժիմ սահմանել, չնայած երկրի մի շարք տարածաշրջաններում կորոնավիրուսով վարակման դեպքերի թվի աճի միտումին: Այդ մասին հուլիսի 17-ին կայացած մամուլի ասուլիսում հայտարարել է նախարարների կաբինետի գլխավոր քարտուղար Յոսիհիդե Սուգան՝ տեղեկացնում է TASS-ը։
«Վարակումների թվի աճը շարունակվում է առաջին հերթին Տոկիոյում: Դա տեղի է ունենում այդ թվում ակումբների ու գինետների հետ կապված աշխատանք ունեցող մարդկանց ակտիվ թեստավորման պատճառով։ Սակայն նոր դեպքերի 80 տոկոսն արձանագրվում է երիտասարդների շրջանում:
Հիվանդանոցներում հիվանդների թվի աճը նկատելի է, սակայն ծանր վիճակով մարդիկ քիչ են, ուստի մենք կարծում ենք, որ ներկայիս իրավիճակն արտակարգ դրության կրկնական սահմանում չի պահանջում»,- ասել է նա:
Հուլիսի 16-ին Ճապոնիայում արձանագրվել է կորոնավիրուսով վարակվելու՝ երեք ամսվա ընթացքում ռեկորդային աճ (624): Նախորդ ռեկորդները՝ 644 և 720, սահմանվել էին համապատասխանաբար ապրիլի 10-ին և 11-ին:
Ըստ որում Տոկիոյում երկրորդ օրն անընդմեջ բժիշկներն առավելագույն թվով վարակումներ են հայտնաբերում համավարակի ամբողջ ընթացքում: Բացի մայրաքաղաքից, համանման իրադրություն է հարևան Կանագավայի, Սայտամայի և Տիբայի պրեֆեկտուրաներում, ինչպես նաև արևմտյան Օսակայում: Ճապոնիայում կորոնավիրուսով վարակվածների ընդհանուր թիվը, ներառյալ Diamond Princess ճամփորդանավի ուղևորներն ու անձնակազմը, գերազանցել է 24 հազարը: Մահացել է 998 մարդ։
