«Մենք մեր տեսակետը այդ պահանջի և, ընդհանրապես, այդ բանակցությունների վերաբերյալ արտահայտել ենք, հետևաբար այս պահի դրությամբ ավելացնելու ոչինչ չունեմ». մեզ հետ զրույցում հետևյալ կերպ արձագանքեց Վահան Հովհաննիսյանը ընդդիմության օրակարգում առաջ քաշված արտահերթ ընտրությունների պահանջին:
Հիշեցենք, որ այսօր Հայ ազգային կոնգրեսը և կոալիցիան հաստատեցին իրենց օրակարգը և ներկայացրին միմյանց:
Հայ ազգային կոնգրեսը առաջարկում է Հայաստանում լեգիտիմ իշխանության շուտափույթ ձևավորման նպատակով արտահերթ նախագահական և խորհրդարանական ընտրությունների անցկացում և դրանց ազատության, արդարության և օրինականության ապահովման անհրաժեշտ միջոցառումներ՝ ժամկետ սահմանելով մինչև հոկտեմբերի կեսերը:
Իսկ Կոալիցիան առաջարկում է ընտրությունների պատշաճ անցկացման նպատակով քաղաքակիրթ մրցակցությունն ապահովող կանոնների ձևավորում։
Հիշեցենք, որ վերջին ասուլիսի ընթացքում ՀՅԴ խմբակցության ղեկավար Վահան Հովհաննիսյանը ողջունեց իշխանություն և ՀԱԿ երկխոսությունը՝ նշելով. «Արդեն սկսում են երևալ երկխոսության արդյունքները: Իշխանությունն ու ՀԱԿ-ը սկսում են համատեղ հարձակում գործել Դաշնակցության վրա, ինչը ես ողջունում եմ, քանի որ մեզ ավելի լավ ենք զգում, երբ մեզ սկսում են հարվածել»: Ինչ վերաբերում է արտահերթ ընտրությունների անցկացման հավանականությանը՝ Վահան Հովհաննիսյանը չբացառեց: «Չեմ բացառում երբեք, որ կարող է արտահերթ ընտրությունների անցկացման անսպասելի որոշում լինել»,- ասաց Վահան Հովհաննիսյանը՝ արձագանքելով լրագրողների այն հարցին, թե հնարավոր է, որ Սերժ Սարգսյանն անսպասելի «գիշերային» որոշում կայացնի արտահերթ ընտրությունների անցկացման մասին։