ՀՀ փոխվարչապետ, տարածքային կառավարման նախարար Ա. Գևորգյանը շարունակում է տեղերում ծանոթանալ մարզի առաջնահերթ խնդիրների լուծման, «Հազարամյակի մարտահրավեր հիմնադրամ-Հայաստան» ծրագրերով իրականացվող աշխատանքների ընթացքին:
Արագածոտնի մարզում մարզպետ Ս.Սահակյանի ուղեկցությամբ փոխվարչապետն այցելեց Նիգավան և Կայք (Մուլքի) համայնքներ, ծանոթացավ մարզի առաջնահերթ խնդիրների լուծման ծրագրով հիմնանորոգվող դպրոցների շինաշխատանքներին: Ծրագրով Նիգավանի դպրոցի վերանորոգման համար հատկացվել է 42 մլն 488 հազար դրամ, իսկ Կայքի դպրոցի համար` 76 մլն 518 հազար դրամ:
Շինարարությունն իրականացնող կազմակերպությունների ղեկավարները Ա. Գևորգյանին վստահեցրին, որ չնայած աշխատանքների ավարտը նախատեսված է նոյեմբերի 30-ին, սակայն դպրոցները շահագործման կհանձնվեն ժամկետից շուտ` մինչև սեպտեմբերի 1-ը: Քննարկվեցին Նիգավանի դպրոցի մարզադահլիճի, հանդիսությունների սրահի և սանհանգույցի վերանորոգման աշխատանքները Հայաստանի սոցիալական ներդրումների հիմնադրամի, իսկ Կայք համայնքի դպրոցի տանիքի և սանհանգույցի հիմանորոգումը «Հայաստան-Արցախ-Սփյուռք» հիմնադրամի աջակցությամբ իրականացնելու հնարավորությունները:
Մարզի Ափնագյուղ համայնքում փոխվարչապետը ծանոթացավ «ՀՄՀ-Հայաստան» ծրագրով երրորդ կարգի ջրանցքի վերականգնման աշխատանքներին: Տեղեկացվեց, որ դրանց հիմնական մասն ավարտված է, շինարարության ընթացքում առաջացած խնդիրները շտկված են, և ջրանցքն ամբողջությամբ կշահագործվի սահմանված ժամկետներում` ոռոգելով համայնքի 100 հեկտար հողատարածք:
Այնուհետև փոխվարչապետն այցելեց Արմավիրի մարզ: Մարզպետ
Ա. Ղահրամանյանի ուղեկցությամբ եղավ Ծիածան, Հայթաղ, Լուկաշին համայնքներում, որտեղ մարզի առաջնահերթ խնդիրների լուծման ծրագրով հիմնանորոգվում են համայնքային դպրոցները: Աշխատանքների համար համապատասխանաբար հատկացվել է 50 մլն դրամ, 94 մլն դրամ և 50 մլն դրամ:
Ա. Գևորգյանին զեկուցվեց, որ բոլոր դպրոցներում հիմնանորոգման աշխատանքները կավարտվեն մինչև սեպտեմբեր` հնարավորություն ստեղծելով նոր ուսումնական տարին սկսել բարեկարգ դպրոցներում:
Ա. Գևորգյանը եղավ նաև Արմավիրի թիվ 5 դպրոցում, որտեղ նույն ծրագրով ամբողջությամբ հիմնանորոգվում են դպրոցի երեք մասնաշենքերը:
Փոխվարչապետը մարզի պատասխանատուներին հանձնարարեց ուշադրության կենտրոնում պահել կատարված աշխատանքների որակը, դրանք ավարտել հնարավորինս սեղմ ժամկետներում` հաշվի առնելով նաև առաջին ծրագրում ընդգրկված կառույցների ամբողջական վերակառուցման աշխատանքներն անհրաժեշտության դեպքում ծրագրի 2-րդ փուլում ընդգրկելու հնարավորությունը:
Այցի ավարտին փոխվարչապետն Արմավիրի մարզպետարանում մարզպետարանի, ՀՀ ՏԿՆ ջրային տնտեսության պետական կոմիտեի, «ՀՄՀ-Հայաստան» ՊՈԱԿ-ի ներկայացուցիչների, Արմավիրի մարզում գործող ՋՕԸ-ի, «Թալին» ՋՕԸ-ի ղեկավարների մասնակցությամբ անցկացրեց խորհրդակցություն, որտեղ քննարկվեցին ընթացիկ հարցեր: Ա. Գևորգյանը ՋՕԸ-ի ղեկավարներին հանձնարարեց անմիջական ուշադրության կենտրոնում պահել իրենց կողմից շահագործվող ոռոգման ենթակառուցվածքների վերականգնման աշխատանքների որակը:
Կարևորվեց ջրի վարձավճարի հավաքագրումն ամբողջական և ժամանակին կազմակերպելու հանգամանքը: Հաշվի առնելով, որ ոռոգման ջրի սկզբնաղբյուրներում նվազել է ջրի քանակը, փոխվարչապետը հանձնարարեց առավելագույն արդյունավետությամբ և համագործակցված կազմակերպել ոռոգման ջրի բաշխումը, որպեսզի մարզում գործող բոլոր ՋՕԸ-երը կարողանան բավարարել իրենց կողմից սպասարկվող ջրօգտագործողների պահանջարկը:
