Այսօր հայ-ադրբեջանական սահմանային լարվածութան ֆոնին ադրբեջանցի ցանցահենները կոտրել են ՀՀ կառավարության պաշտոնական կայքէջն ու տեղադրել ադրբեջանցի զինծառայողների լուսանկարներ, Ադրբեջանի նախագահ Իլհամ Ալիևի ելույթներից հատվածներ ու իրենց պետական դրոշը։
Տեղեկատվական տեխնոլոգիաների անվտանգության փորձագետ Սամվել Մարտիրոսյանի խոսքով՝ պետական գերատեսչությունների կայքերի անվտանգությամբ Ազգային անվտանգության ծառայությունն է զբաղվում, և իրենք պետք է վերահսկեն վիճակը, ինքը դրա հետ կապված մանրամասների չի տիրապետում։
Սամվել Մարտիրոսյանի խոսքով՝ պատերազմական իրավիճակներում շատ կարևոր է նաև կիբերհարձակումներից պաշտպանությունը, կիբերանվտանգության բարձրացումը, որպեսզի նման դեպքեր չլինեն: «Այդ կայքերը երկրի թիվ մեկ կայքերն են, ու կարևոր է, որպեսզի դրանց վրա հնարավորություն չլինի ուրիշ բան տեղադրելու։ Չեմ ուզում ասել, թե հնարավոր ինչեր կարող էին լինել դրա արդյունքում»,- ասաց Մարտիրոսյանը։
Մեր հարցին՝ Հայաստանում կիբերանվտանգությո՞ւնն է թույլ, թե՞ հակառակորդն է լուրջ ջանքեր գործադրում այդ ուղղությամբ, Մարտիրոսյանն ասաց, որ չի կարող այս ոլորտում մեր պաշտպանությունը գնահատել, բայց հակառակորդն էլ այդ ոլորտում տարեցտարի աճում է։ Այնպես չէ, որ տեղում դոփում են։ «Մենք խնդիր ունենք։ Այդ խնդիրը երևաց նաև մեկ ամիս առաջ, երբ կորոնավիրուսով վարակված զինծառայողների տվյալների արտահոսք եղավ։ Ինձ թվում է, որ արդեն այդ ժամանակ պետք էր կռահել, թե ուրիշ ինչ կարող էր լինել։ Ես նաև կարող եմ ասել, որ primeminister.am-ն արդեն 1 տարվա մեջ երկրորդ անգամ է կոտրվում։ Իսկ պետական կայքերի տեխնիկական պաշտպանությունն ԱԱԾ-ն է իրականացնում 2009 թվականից»,- ասաց Մարտիորսյանը։
Մեր հարցին՝ 2016 թվականի ապրիլյան պատերազմի համեմատ տեղեկատվական անվտանգության այս ոլորտում ինչ-որ բան փոխվե՞լ է, թե՞ ոչ, Մարտիրոսյանը պատասխանեց. «Ցավալի է, բայց բան չի փոխվել փաստացի։ Տարիներ շարունակ ուրիշ կոնցեպցիաներ են գրվում, բայց ոչինչ չի ընդունվում։ Իրականում, մեծ հաշվով, 2009-ից որևէ լուրջ փոփոխություն չի եղել, ինչը շատ վատ է»։
Նշենք, որ բացի կառավարության պաշտոնական կայքից, ավելի ուշ ադրբեջանցի ցանցահենները կոտրեցին նաև Հակաստանի էլեկտրական ցանցերի պաշտոնական կայքը՝ տեղադրելով «Ղարաբաղը Ադրբեջանն է» ու նմանատիպ այլ՝ հակահայկական գրառումներ։