Կադաստրի պետական կոմիտեի նախկին նախագահ Սարհատ Պետրոսյանը ֆեյսբուքյան իր էջում անդրադարձել է Ֆիրդուսի կառուցապատման նախագծին՝ նշելով, որ այն չի տեղավորվում Երեւանի կենտրոնի գոեւորման նախագծի շրջանակում.
«Իհարկե սահմանային վիճակը թույլ չի տալիս որեւէ այլ բանի մասին մտածել, սակայն գործընկերոջս գրառումը ստիպեց աչքի տակով անցկացնել Երեւան քաղաքի առկա տարածական պլանավորման նախագծերը։
Դրա արդյունքում բացահայտեցի, որ Ֆիրդուսի թաղամասի քննարկվող նախագիծը չի տեղավորվում Երեւանի կենտրոնի գոտեւորման նախագծի շրջանակում, ուստի նախորդիվ տրված նախագծման թույլտվությունները (նույն АПЗ-ները) պետք է համարվեն անվավեր։
Ավելին, ներկայացված նախագծի հիման վրա պետք է մշակվի, կամ ինչպես սիրում են ասել որոշ գործընկերներ՝ ճշգրտվի, Երեւանի կենտրոնի գոտեւորման նախագիծը, անցնի տարածական պլանավորման փաստաթղթերի (իմա՝ գլխավոր հատակագծերի) համաձայնեցման ամբողջական գործընթացը, այդ թվում Շրջակա միջավայրի վրա ազդեցության գնահատում, մի քանի հանրային լսումներ, միջգերատեսչական քննարկումներ եւ վերջում հաստատվի Երեւանի ավագանու կողմից։
Այնպես, որ Երեւանի ավագանու, որի մի քանի անդամները շատ սկզբունքային գտնվեցին վերջին քննարկումների ժամանակ, ձեռքում է լինելու այս նախագծի հետագա ճակատագիրը։ Այնպես որ, ինչպես ասում են. սկսենք նորից»,- գրել է Պետրոսյանը։
