Թուրքիան չի ընդունի ԱՄՆ Կոնգրեսի՝ քրիստոնեական հողերը պատմական տերերին վերադարձնելու կոչը: Այսօր լրագրողների հետ հանդիպման ժամանակ հայտարարեց ԳԱԱ արևելագիտության ինստիտուտի տնօրեն, թուրքագետ Ռուբեն Սաֆրաստյանը՝ հավելելով, որ բանաձևը ներկայացվել է ԱՄՆ Կոնգրեսում, բայց չի հաստատվել։
Հիշեցնենք, որ օրերս ԱՄՆ Կոնգրեսի Ներկայացուցիչների պալատի կողմից ներկայացվեց համապարփակ թիվ 306 բանաձևը, որը Թուրքիայի կառավարությանը կոչ է անում վերջ դնել կրոնական խտրականությանը և օրինական տերերին վերադարձնել եկեղեցիներն ու պաշտամունքային այլ վայրերը: Այս երկկուսակցական բանաձևը ներկայացրել էին հանրապետական կոնգրեսական Էդ Ռոյսը և դեմոկրատ կոնգրեսական Հովարդ Բերմանը և անմիջապես ստացել էին պալատում իրենց գործընկերներից 30-ի աջակցությունը, որից տասը հանրապետականներ էին: ԱՄՆ հանրապետական կոնգրեսական, Ներկայացուցիչների պալատի արտաքին գործերի հանձնաժողովի նախագահ Իլեանա Ռոս-Լեհթինենը, որը պայքարում էր նաև Հայոց ցեղասպանության բանաձևի ընդունման համար, առաջինն էր, որ սատարեց եկեղեցու գույքի վերադարձման մասին ներկայացված բանաձևին:
Ըստ քաղաքագետի՝ Թուրքիայի կողմից բանաձևն ընդունվելու դեպքում պարզ կդառնա, որ այսքան ժամանակ թուրքերն ապրել են քրիստոնեական հողում:
«Թուրքիան ժամանակ չունի Հայաստանի հետ հարաբերությունները կարգավորելու համար, քանի որ արաբական ապստամբությունից փորձում է քաղել դրականը և ներքաշվել է Սիրիայում տեղի ունեցող գործընթացներին»,- ասաց Ռ.Սաֆրաստյանը՝ շարունակելով, որ սկզբունքային փոփոխություններ չի տեսնում:
Անդրադառնալով ԼՂՀ հիմնախնդրին՝ քաղաքագետն ընդգծեց, որ Թուրքիան կշարունակի պաշտպանել Ադրբեջանի դիրքորոշումը, քանի որ ստրատեգիական համաձայնություն կա երկու պետությունների միջև:
«Այս երկու պետություններն ունեն իրենց համատեղ շահերը, սակայն վերջին շրջանում կան նաև հակասություններ գազի գնի հետ կապված: Այս հարցի շուրջ նրանք երկար ժամանակ չեն կարողանում համաձայնության գալ»,- մեկնաբանեց Ռ.Սաֆրաստյանը՝ այնուամենայնիվ հաստատելով, որ Թուրքիա- Ադրբեջան հարաբերությունները չեն լարվի: