ԱՄՆ նախագահ Բարաք Օբաման և ԱՄՆ Կոնգրեսի Ներկայացուցիչների պալատի խոսնակ Ջոն Բրեյերը երեկ հանդես են եկել ամերիկյան խոշորագույն հեռուստաալիքների եթերում, որտեղ խոսել են սպասվող դեֆոլտի մասին, եթե հանրապետական և դեմոկրատական կուսակցության ներկայացուցիչներին չհաջողվի համաձայնության գալ:
Երկու ելույթներն էլ եղել են փրայմ թայմի ընթացքում, երբ առավել շատ մարդ է դիտում դրանք: Սկզբում եղել է Օբամայի ելույթը, ապա մի քանի րոպե անց սկսվել է նրա հիմնական ընդդիմախոսի հեռուստաուղերձը: «Եթե մենք դեֆոլտ հայտարարենք, անհրաժեշտ միջոցներ չենք ունենա վճարումներ կատարելու, այդ թվում՝ կենսաթոշակների և հաշմանդամության, ինչպես նաև կառավարական պայմանագրերի պարտավորությունների, որոնք կնքվել են հազարավոր ընկերությունների հետ»,- ասել է Օբաման:
Օբաման լրջագույն խնդիրներ է կանխատեսում նաև օտարերկրյա ներդրողների հետ փոխհարաբերությունների հարցում, որոնք դեֆոլտից հետո կասկած կհայտնեն ամերիկյան կառավարության հետ աշխատելու վերաբերյալ:
Բեյներն իր հերթին տնտեսական ներկա իրավիճակի ողջ պատասխանատվությունը դրել է Օբամայի վրա։ «Եթե նախագահն ուզում է Կոնգրեսից թույլտվություն ստանալ՝ ավելացնելու թույլատրելի վերին շեմը առանց դա պետական ծախսերի կրճատման հետ փոխկապակցելու, ապա նա դա չի ստանա»,- ասել է խոսնակը:
Հանրապետականները պնդում են, որ անհապաղ պետք է քննարկվի և ընդունվի պետական ծախսերի կրճատման հարցը, այլապես իրենք չեն համաձայնի նորից ավելացնել պետական պարտքերը: