Շաբաթ օրը մի խումբ երիտասարդ բլոգերներ՝ Արտավազդ Եղիազարյանը, Արման Սուլեյմանյանը, Սամվել Մարտիրոսյանը հանդիպել են մշակույթի նախարար Հասմիկ Պողոսյանի հետ, քննարկել տարբեր ոլորտի արդի խնդիրները։
Ի թիվս այլ խնդիրների՝ անդրադարձ է կատարվել Գյումրիի Մինասի որմնանկարները «Զվարթնոց» օդանավակայան տեղափոխելու նախարարության վիճահարույց որոշմանը։
«Առաջին լրատվականն» այս կապակցությամբ զրուցեց հայտնի բլոգեր Սամվել Մարտիրոսյանի հետ, ով որոշ մանրամասներ հաղորդեց հանդիպումից։
«Հանդիպումը Մինասի հարցով չի եղել։ Դա հանդիպում էլ չէր, ուղղակի տարբեր թեմաներ են քննարկվել։ Ընդհանուր բնույթի ֆորմատով հանդիպում էր։ Օրինակ՝ շոշափվել են Սանահինի եկեղեցու վերականգնման հետ կապված հարցեր»,- ասաց Ս.Մարտիրոսյանը՝ ավելացնելով, թե չի կարող ասել, թե ինչ-որ հարցի քննարկման շուրջ եկել են եզրակացության։
Մինասի որմնանկարները Երևան տեղախոփոխելու հետ կապված հարցը, նրա խոսքով, տվել է «Ռադիո Վանի» բլոգեր Արման Սուլեյմանյանը։
Վերջինս հանդիպումից մի քանի օր առաջ ռադիոյում գրել էր մշակույթի նախարարի հետ կայանալիք հանդիպման մասին ու ցանկացողներին առաջարկել մեկ հարց գրել՝ ուղղված նրան։
Հարցը հետևյալն էր. «Եթե մի խումբ գյումրեցիներ հենց այսօր գումար ներդնեն, արդյո՞ք մշակույթի նախարարությունը թույլ կտա Զվարթնոցը տեղափոխել Գյումրի»։ Մշակույթի նախարարն ի պատասխան ասել է, որ չի ցանկանում պատասխանել նման կարգի հարցերի, քանի որ այդ կարգի հարց տվողը բացարձակ պատկերացում չունի՝ ինչի մասին է խոսում և որ պատմամշակութային ժառանգության պահպանությունը չի կարող դառնալ ցինիզմի առարկա։ Մշակույթի նախարարին վրդովեցրել է այն հանգամանքը, որ տարիներ շարունակ այդ որմնանկարները մնացել են բարձիթողի ու չեն հետաքրքրել որևէ մեկի։ Նա անընդունելի է համարել արվեստի ներկայացուցիչներին մեր ու ձերը տարբերակելու փորձերը։
Ինչպես հայտնի է, հարցի հեղինակը Գյումրիի ժուռնալիստների «Ասպարեզ» ակումբի նախագահ Լևոն Բարսեղյանն է։
Նկատենք, սակայն, որ ստորև բերվող տեսանյութում ամենաապշեցուցիչ հանգամանքն այն է, որ ՀՀ մշակույթի նախարարը հարցերին պատասխանում է ոչ թե ՀՀ պետական լեզվով՝ հայերենով, այլ ռուսերենով։
Տեսանյութ.
