Ճարտարապետ Կարեն Ռաշիդյանը «Առաջին լրատվական»-ի հետ զրույցում, մեկնաբանելով Հյուսիսային պողոտայում կառուցված շենքերի փլուզման վերաբերյալ մամուլում շրջանառվող լուրերը, ասաց, որ ներկայումս կառուցված շենքերը կառուցվում են այսօրվա չափանիշներին համապատասխան, և կոնստրուկտորը շենք կառուցելիս հաշվի է առնում շենքի կառուցման համար անհրաժեշտ բոլոր պայմաննները։
«Ես չեմ հավատում նման զրույցների։ Դա բացառվում է։ Այդ խոսակցությունների պատճառն այն է, որ մարդիկ աշխատանք չունեն»,- ասաց ճարտարապետը։
Հարցին՝ արդյո՞ք Հյուսիսային պողոտայի տակով անցնում են գրունտային ջրեր, և արդյո՞ք դրանք կարող են վնասել շենքերին, Կարեն Ռաշիդյանը պատասխանեց, թե գուցե կան գրունտային ջրեր, բայց դրանց մակարդակը շատ ցածր է։ «Պարզապես ծիծաղելի է»,- հավելեց նա՝ ավելացնելով, որ ցանկացած շենքի կառուցման համար անհրաժեշտ է կոնստրուկտորի, երկրաբանի ուսումնասիրությունը, որոնք վերցնում են գրունտի նմուշները, դրանք ուղարկում փորձաքննության, ապա նոր տալիս շենք կառուցելու թույլտվություն, քանի որ դա ճակատագրի հարց է։
Յուրաքանչյուր նոր կառուցված շենք, նրա խոսքով, համապատասխանում է սեյսմիկ անվտանգության բոլոր կանոններին։
«Ես հավատում եմ մեր նախագծողներին»,- վստահ ասաց ճարտարապետը։