Նորվեգիայում այնքան քիչ են հանցագործությունները, որ պետությունը սկսել էր քիչ ուշադրություն դարձնել ոստիկանության վերազինմանը և անհրաժեշտ տեխնիկայով ապահովմանը: Ինչպես նշվում է երեկ ոստիկանության կողմից տարածված հաղորդագրության մեջ, Ուտեյա կղզում առնվազն 87 երիտասարդի սպանության արագ կանխման հարցում ոստիկանությանը խանգարել է անհրաժեշտ տրանսպորտի բացակայությունը: Այս մասին հաղորդում է Reuters գործակալությունը:
Ոստիկանությունը դեպքի մասին իմանալուց հետո այստեղ է ժամանել զբոսանավերով: Մինչ ոստիկանությունը տեղ կհասներ, մոտ 30 երիտասարդի փրկել է նախկին մի զինվորական, որը գտնվում էր դեպքի վայրից ոչ հեռու: Ոստիկանությունը դեպքի վայր է ժամանել դրա մասին իմանալուց մեկուկես ժամ անց միայն: «Երբ մարդիկ և նրանց հանդերձանքը հայտնվել են նավակի վրա, այն սկսվել է ջրով լցվել, որի հետևանքով նրա շարժիչը հանգել է: Նավակը փոքր և հին էր»,- ասել է ոստիկանության ներկայացուցիչ Էրիկ Բերգան:
Բացի այդ, հայտնի է, որ Օսլոյից այստեղ ժամանող հատուկջոկատայինները նույնպես ուշացել են, քանի որ ոստիկանական ուղղաթիռը հեռու է եղել մոտ 50-60 կմ-ով:
