«Ոստիկանության անձնակազմը վերջին 2-3 ամիսներին ծանր վիճակում էր։ Նրանց ծառայողական ծանրաբեռնվածությունը ավելացել էր մի քանի անգամ, ու նրանց համար անհասկանալի էր, թե ինչու իր պետին աշխատասենյակում սուրճ տվող ոստիկանն ու փողոցում կրկնակի, եռակի ծանրաբեռնվածությամբ աշխատող ոստիկանը պետք է նույն հավելավճարը ստանային։ Ասեմ ավելին, այս ամիսներին ոստիկանների ստացած ընդհանուր գումարը նույնիսկ նվազել էր։ Ոստիկանության աշխատանքը, որը արվում էր, չէր գնահատվում նրանց ղեկավարի կողմից, ինչի պատճառով լուռ սաբոտաժ է արվել ծառայության նկատմամբ»,- «Առաջին լրատվական»-ի հետ զրույցում ասաց ոստիկանության գնդապետ, Ռազմական ոստիկանության նախկին պետի տեղակալ Աշոտ Վանյանը՝ անդրադառնալով ՈՍ պետի պաշտոնանկությանը։
Վանյանի խոսքով՝ արտակարգ դրության այս ամիսներին ոստիկանները իրենց ստացած չնչին գումարը ստիպված են եղել ծախսել իրենց ուտելիքի, տրանսպորտի և այլ ծախսերի համար, ինչն էլ ազդել է ոստիկանության աշխատանքի, ծառայության արդյունավետության վրա։
Վանյանն ասաց, որ երբ ոստիկանությունում իմացել են Արման Սարգսյանի պաշտոնանկության մասին, շարքային անձնակազմի մոտ տոն է եղել, նրանք զանգահարել, շնորհավորել են իրար։
Ինչ վերաբերում է նորանշանակ ոստիկանապետին, Վանյանն ասաց, որ իմանալով նրա ծառայողական ուղին՝ կարող է ասել, որ Ղազարյանի մոտ մեծ ցանկություն կա համակարգում աշխատելու, ծառայելու պետությանը և հեղափոխությանը: «Ես շատ ուրախ եմ, որ գնդապետ Ղազարյանը նշանակվել է ոստիկանապետ։ Նա կոռուպցիոն ռիսկերից հեռու մարդ է»,- նշեց Վանյանը:
Առավել մանրամասն՝ տեսանյութում:
