Այս տարի՝ 14 դարերի մեջ առաջին անգամ, մենք չկարողացանք տոնել Գարեջոբան և Զատկին այցելել վանք, քանի որ առկա է բռնազավթում, բռնագրավում և ագրեսիա: Այս մասին ճեպազրույցի ժամանակ հայտարարել է Վրաստանի Լեյբորիստական կուսակցության առաջնորդ Շալվա Նաթելաշվիլին:
«Վացի և ադրբեջանցի ժողովուրդները ապրել են, ապրում են և ապրելու են միասին: Խոսքը հանցավոր կառավարությունների քաղաքականության մասին է, որից տառապում են երկու ժողովուրդները: Ուստի, մի քանի ամսից, երբ փոխվի Իվանիշվիլիի ռեժիմը, կհարուցվի քրեական գործ Վրաստանի տարածքի դեմ հանցանքի համար, ինչը նախատեսում է ցմահ ազատազրկում: Իվանիշվիլիի ամբողջ ոհմակը պատասխանատվություն կկրի Վրաստանի տարածքը հանձնելու և օտարելու համար: Եթե այժմ ասենք այդ ճշմարտությունը, կհամարվի ռասայական խտրականություն, այդ ժամանակ մենք պետք է դադարեցնենք նաև ռուսական օկուպացիայի մասին խոսակցությունները, որովհետև դա ևս կարող է համարվել ռասայական թշնամանքի բորբոքում, մենք նաև պետք է կանգ առնենք աբխազական և օսեթական անջատողականության առնչությամբ. նաև դա կարող է դիտարկվել որպես ռասայական թշնամանքի բորբոքում: Վերջնարդյունքում, յուրաքանչյուր երկիր, երբ հարևանը գրավում է նրա հողը, տարածքը, սրբավայրը, պետք է լռի, որպեսզի չընկալվի որպես ռասայական թշնամանքի բորբոքում: Կարելի է պատկերացնել, թե ինչ նիշի է հասել օլիգարխի գործունեության մեջ դավաճանության գործակիցը»,- ասել է Շալվա Նաթելաշվիլին:
Նրա խոսքով՝ նախագահ Ալիևը փոխանակ պայքարի բռնազավթված Լեռնային Ղարաբաղի համար, վրացիներից խլել է սրբավայրերը՝ ընտրողների մոտ պարծենալու համար, թե մենք թեև չվերադարձրինք Ղարաբաղը, փոխարենը ճնշեցինք Վրաստանին: