Ադրբեջանական Salam News գործակալության փոխանցմամբ՝ այսօր Ստամբուլում մեկնարկել է «Պաղեստինցի դեսպանների կոնֆերանսը»։ Վերջինիս մասնակցում են Պաղեստինի արտգործնախարարության և օտար երկրներում Պաղեստինի ներկայացուցչությունների աշխատակիցները։
Կոնֆերանսի բացման արարողության ժամանակ Թուրքիայի վարչապետ Էրդողանը հայտարարել է. «Եթե Իսրայելը ներողություն չխնդրի, ապա երկու երկրների միջև հարաբերությունները չեն կարգավորվի։ Եթե Իսրայելը պաշտոնապես ներողություն չխնդրի իրավունքի միջազգային նորմերին և մարդկային արժեքներին հակասող ապօրինի գործողությունների համար, փոխհատուցում չվճարի տուժածների հարազատներին, չվերացնի Գազայի շրջափակումը, անհնար կլինի երկու երկրների փոխհարաբերությունների կարգավորման մասին մտածելը։
Ոչ մի դավանանք, ոչ մի գաղափար չի համաձայնի անմեղ մարդկանց գազանային, բարբարոսական սպանության հետ։ Ինչպե՞ս Իսրայելը կարող է բացատրել անմեղ մարդկանց գնդակահարությունը։ Դա միայն պաղեստինյան հարց չէ։ Պաղեստինի պահանջները Թուրքիայի խնդիրն են։ Պետք է քայլեր ձեռնարկել, որպեսզի քաղաքացիական բնակչությունը չտուժի։
Տարածաշրջանի խնդիրները կարող են լուծվել միայն տարածաշրջանի երկրների ընդհանուր ջանքերով։ Իսրայելա-պաղեստինյան հարցը միտումնավոր ներկայացվում է որպես միայն պաղեստինյան։ Իսրայելը պետք է Արևելյան Երուսաղեմը ճանաչի որպես Պաղեստինի մայրաքաղաք։ Պաղեստինը պետք է հնարավորինս շուտ միավորվի Գազայի հատվածի հետ։ Արդեն բոլորը գիտեն, թե ինչ է կատարվում Գազայում։ Գազայի շրջափակման մասին խոսակցություններն ընդհանրապես անտանելի են»։
Հիշեցնենք, որ վերոնշյալ կոնֆերանսին մասնակցելու նպատակով երեկ Ստամբուլ է ժամանել Պաղեստինի առաջնորդ Մահմուդ Աբասը, ով Թուրքիայի վարչապետ Ռեջեփ Էրդողանի ու արտգործնախարար Ահմեդ Դավութօղլուի հետ հանդիպումների ժամանակ քննարկելու է երկկողմանի հարաբերությունների խնդիրը, Պաղեստինում տիրող իրավիճակը, մերձավորարևելյան խաղաղ գործընթացը և տարածաշրջանային վերջին զարգացումները։
