Грузия Online-ի փոխանցմամբ՝ ընդդիմադիր «Վրացական» կուսակցության առաջնորդ, նախկին պաշտպանության նախարար Իրակլի Օքրուաշվիլին «Մաեստրո» TV-ին տված հարցազրույցում վստահեցրել է, որ մայիսյան հեղափոխության պլանը դիտարկել է ընդդիմության առաջնորդ Նինո Բուրջանաձեի հետ.
«Այն բանից հետո, երբ Լևան Գաչեչիլաձեն դավաճանություն գործեց և գործող իշխանություններին վաճառեց հեղափոխության պլանը, Բուրջանաձեն ամբողջովին հեռացվեց «Վրացական» կուսակցության առաջնորդների շարքերից։
Որ Բուրջանաձեն չուներ անգամ 0.1 տոկոս ուղեղ՝ հայտնի էր նաև մինչ այդ, բայց նրա ամուսնու՝ Բադրի Բիցաձեի պրագմատիկության մեջ իսկապես սխալվեցինք։ Լևան Գաչեչիլաձեն Բուրջանաձեին համոզել է, թե մենք պատրաստվում ենք հեղափոխություն իրականացնել ռուսական տանկերի միջոցով, ինչը լիակատար անհեթեթություն է։
Սակայն ես շատ զարմացա, թե ինչու ռուսական տանկերի մասին լսելուց վախեցավ Բուրջանաձեն, ով Պուտինի և այլոց հետ Մոսկվայում ռազմական շքերթ է ընդունել։ Եթե մենք չլինեինք Բուրջանաձեի սցենարում, նա ոչինչ չէր ձեռնարկի, իսկ եթե Բուրջանաձեն չլիներ մեր սցենարում, մենք ամեն դեպքում կհասնեինք մեր առջև դրված նպատակին, եթե Գաչեչիլաձեն չվաճառեր սցենարը։
Հենց դա է իմ անձնական սխալը։ Ես կարծում էի, թե ի վերջո կհաղթի Բուրջանաձեի ամուսնու պրագմատիզմը, և որ մենք մայիսի 25-ի հետ կապված՝ կհասնենք կոնսենսուսի»։
Հիշեցնենք, որ մայիսի վերջին Բուրջանաձեն, մեկնաբանելով իշխանափոխության իրագործման նպատակով Իրակլի Օքրուաշվիլիի՝ Վրաստան չայցելելու և փոշմանելու մասին լուրը, հայտարարել է, որ նրան չի բավականացրել համարձակությունը.
«Դժբախտաբար, հաճախ վրացի տղամարդկանց չի բավականացնում քաջությունը՝ սեփական վախը խոստովանելու համար: Իշխանափոխության հարցում ես ի սկզբանե տարաձայնություններ ունեի «Վրացական» կուսակցության հետ: Օքրուաշվիլին ցանկանում էր դրան հասնել ուժային մեթոդներով, ինչն ինձ համար անընդունելի է: Դրա համար էլ մեր համաձայնությունը չկայացավ»:
