Մայիսի 8-ին Turkustan.info-ն հաղորդել է, որ իրենց խմբագրությունը լուսանկարներ և տեսանյութ է ստացել Ադրբեջանում վաճառվող հայկական ծխախոտի վերաբերյալ։ Կայքի տվյալների համաձայն, փաստերն ուղարկած տեղի բնակիչը հաղորդել է, որ գնել է ծխախոտը Սաբիրաբադի (քաղաք Ադրբեջանում) խանութներից մեկում։
Տեսանյութում ասվում է․ «Ես Սաբիրաբադի փոքր խանութներից մեկում էի։ Ես ծխախոտ գնեցի և դուրս եկա։ Դրանց վրա գրված է «Մասիս»։ Այնուհետև ուշադիր նայելով տեսա՝ «Արտադրված է Հայաստանում» (Made in Armenia) գրությունը։
Արդեն երեք ամիս է, ինչ երկրում կարանտին է մտցված։ Մենք ոչ մի տեղ չենք կարող դուրս գալ։ Ես չեմ հասկանում, թե ինչպես է Հայաստանում արտադրված ծխախոտը հասցվել Ադրբեջան»։
Դատելով մեքենաների համարներից, որոնք կարելի է տեսնել տեսանյութում, հոլովակն իրականում նկարահանվել է Ադրբեջանում և կեղծ չէ: Ծխախոտն իսկապես հայկական է և արտադրվում է «International Masis Tabak»- ի կողմից:
Այս լուրը չափազանց ուշագրավ է և ցույց է տալիս, թե ինչպես է ծխախոտի փոքրիկ տուփն իրարանցում առաջացնում: Մի՞թե «Պատրաստված է Հայաստանում» մակագրությունն իսկապես սարսափեցնում է «խիզախ հայրենասերներին»:
Ավելի վաղ Ինֆոտեկա 24 պորտալը հաղորդել էր, որ Ադրբեջանում հայկական արտադրության ապրանքներ են ոչնչացվել, մասնավորապես՝ հայկական կոնյակ և հայերեն գրքեր: