Ամերիկյան Sorrento Therapeutics կենսադեղագործական ընկերության գիտնականները հակամարմինների տեսակ են հայտնաբերել, որը մարդու բջիջները պաշտպանում է կորոնավիրուսի ներթափանցումից և չորս օրվա ընթացքում հեռացնում այն օրգանիզմից:
Fox News հեռուստաալիքի փոխանցմամբ, ընկերության հիմնադիր Հենրի Ջին ասել է, որ փորձագետը կարողացել է հայտնաբերել STI-1499 հակամարմինը, որը կարող է «100%-ով ճնշել» COVID-19-ը: Նրա խոսքով, դրա օգտագործումը կարելի է սկսել դեռևս չստեղծված պատվաստանյութի թողարկումից մի քանի ամիս առաջ: Ջին նշել է, որ իր ընկերությունը գտել է «բուժման մեթոդը»:
«Կա 100%-ոց լուծում: Եթե ձեր օրգանիզմում կա չեզոքացնող հակամարմին, ապա ձեզ հարկավոր չէ անվտանգ հեռավորություն պահպանել»,- շեշտել է նա:
Ըստ Ջիի, վերջին 10 տարվա ընթացքում նրա ընկերության գիտնականներն ուսումնասիրել են միլիարդավոր հակամարմիններ, դրանցից ընտրել են մի քանի հարյուր «առավել խոստումնալիցները», որոնցից մոտ մեկ տասնյակը մարդու բջիջներ COVID-19-ի ներթափանցումն արգելափակող ունակություն է ցույց տվել: Բոլոր դեպքերում STI-1499-ը դա անում է հաջողությամբ:
Ընկերության ղեկավարը բացատրել է, որ վիրուսը չի գոյատևում, եթե չի կարողանում ներթափանցել բջիջ: Իսկ այս հակամարմինները պարուրում են կորոնավիրուսը, այնուհետև չորս օրվա ընթացքում հեռացնում այն օրգանիզմից, ընդ որում՝ առանց կողմնակի բարդությունների:
