Թուրքական Milliyet թերթի փոխանցմամբ՝ Թուրքիայի նախագահական ապարատի մամլո ծառայության տարածած հաղորդագրության համաձայն, նախագահ Աբդուլլահ Գյուլը նոյեմբերի 22-24-ը պետական այցով ժամանելու է Մեծ Բրիտանիա։
Բրիտանական այցի ժամանակ Գյուլին ուղեկցելու է Թուրքիայի առաջին տիկին Հայրյունիսա Գյուլը։ Այդ այցը կայանում է Մեծ Բրիտանիայի թագուհի Էլիզաբեթ 2-րդի հրավերի հիման վրա։
Նշվում է, որ սա Թուրքիայի նախագահի առաջին բրիտանական պաշտոնական այցն է վերջին 23 տարիների ընթացքում։ Վերջին անգամ Թուրքիայի 7-րդ նախագահ Քենան Էվրենն է 1988 թվականին պաշտոնական այցով մեկնել Մեծ Բրիտանիա։
Հիշեցնենք, որ նախորդ տարվա նոյեմբերի 9-ին Մեծ Բրիտանիայի Միջազգային հարաբերությունների թագավորական ինստիտուտը, որը հայտնի է Chatham House անունով, տարվա քաղաքական գործչի մրցանակը հանձնեց Աբդուլլահ Գյուլին: Լոնդոնում այն անձամբ Գյուլին էր հանձնել հենց Էլիզաբեթ 2-րդը։
