«Զգույշ ապրելու ուղղությամբ ենք գնում, տնտեսական կոլապսն ավելի վտանգավոր է»,- «Առաջին լրատվական»-ի հետ զրույցում այս մասին ասաց ԱԺ պատգամավոր Հովհաննես Իգիթյանը՝ անդրադառնալով դիտարկմանը, որ ԱԺ-ում այսօր քննարկվում էր արտակարգ դրության ժամկետի երկարաձգման հարցը:
Հովհաննես Իգիթյանը, անդրադառնալով դիտարկմանը, որ ներքաղաքական մթնոլորտում որոշակի ագրեսիվություն է ի հայտ եկել, նշեց, որ այս իրավիճակում շատ կարևոր է ժողովրդի վստահությունը կառավարության հանդեպ: «Վտանգի պահերին ժողովուրդը սկսում է ավելի շատ հավաքվել կառավարության շուրջ, և պարզ է, որ դա շատ ուժերի պետք է նյարդայնացներ: Եվ այս ծանր սոցիալական, տնտեսական իրավիճակում որոշ քաղաքական ուժեր կորցրեցին իրենց օրակարգը և սկսեցին շահարկումները»:
Պատգամավորն անդրադառնալով դիտարկմանը, որ նախօրեին դատարանը մերժել է Ռոբերտ Քոչարյանի խափանման միջոցը փոխելու վերաբերյալ նախկին վարչապետների միջնորդությունը, նշեց, որ դատարանի վճիռն անակնկալ չէր: «Ներկայացվել է միջնորդություն, թե ինչ պատճառաբանությամբ, ինչ հիմքերով պետք է փոխվի Ռ. Քոչարյանի խափանման միջոցը, և դատարանը կայացրել է այդ որոշումը: Ի՞նչ է փոխվել, որ խափանման միջոցը փոխվի: Մեր օրենսդրությամբ հասարակության մեջ մեծ հեղինակություն ունեցող մարդիկ կարող են հանդես գալ երաշխավորությամբ, այս չորս վարչապետներն արդյո՞ք հասարակության մեջ ունեն այն վստահությունը, որ Ռ. Քոչարյանի խափանման միջոց կալանքը փոխվի: Ո՛չ: Չորս վարչապետներից երկուսը Մարտի 1-ի գործով առնվազն որպես վկա պետք է հանդես գան: Այստեղ ոչ միայն բարոյական, այլ նաև իրավական խնդիր կա:
Հասարակությունը սպասում է Մարտի 1-ի բուն դատավարությանը: Պատգամավորի դիտարկմամբ՝ Ռ. Քոչարյանի պաշտպանական թիմը շահագրգռված չէ, որ դատավարությունը մեկնարկի. «Նույնիսկ կալանքի տակ ժամանակն աշխատում է Ռոբերտ Քոչարյանի օգտին»:
Մանրամասն՝ տեսանյութում: