Արցախի Հանրապետության Անվտանգության խորհրդի քարտուղար Արշավիր Ղարամյանը պաշտոնից ազատման դիմում է գրել: Այս մասին Ղարամյանը հայտնել է «Ֆեյսբուք»-ի իր պաշտոնական էջում: «Հարգելի հայրենակիցներ, ցանկանում եմ տեղեկացնել, որ ԱՀ անվտանգության խորհրդի քարտուղարի պաշտոնից ազատման դիմում եմ ներկայացրել, ինչը, իհարկե, չի նշանակում, որ ինքս ինձ «ազատում եմ» Արցախի անվտանգության ապահովման գործում ունեցած անձնական պատասխանատվությունից: Ողջ կյանքս նվիրել եմ մեր հայրենիքի ազգային-ազատագրական պայքարին, բոլոր հնարավորություններս օգտագործել եմ մեր ընդհանուր անվտանգության ապահովման գործում իմ համեստ չափաբաժինն ունենալու հարցում: Հավաստիացնում եմ, որ անկախ պաշտոնից, կարգավիճակից՝ շարունակելու եմ իմ առաքելությունը: Մի քանի անգամ տարբեր առիթներով ասել եմ, որ ոչինչ չի խանգարում մարդուն օգտակար լինել իր հայրենիքին՝ անկախ նրանից, թե որքան հնարավորություններ ունի նա, որ ոլորտում կարող է օգտակար լինել կամ ինչ կարգավիճակ ունի»,- նշել է Ղարամյանը:
Քաղաքական մեկնաբան Հակոբ Բադալյանի կարծիքով՝ Արշավիր Ղարամյանի հրաժարականն ունի քաղաքական նշանակություն: «Արցախում նոր նախագահ է ընտրվել, առաջիկայում նախագահի պաշտոնամուտն է տեղի ունենալու, և տրամաբանական է, որ առանձին պաշտոններում կլինեն կադրային վերադասավորումներ»,- «Առաջին լրատվական»-ի հետ զրույցում ասաց նա։
Բադալյանի դիտարկմամբ՝ շատ սպասելի կլինի, որ վերջին քառորդ դարի իշխող համակարգը աստիճանաբար դուրս գա քաղաքական ասպարեզից. «Որքան էլ նորընտիր նախագահ Արայիկ Հարությունյանը, մեծ հաշվով, նախկին համակարգի ներկայացուցիչ է՝ 10 տարի այդ համակարգում եղել է վարչապետ, այդուհանդերձ հասկանալի է, որ քաղաքական ընդհանուր միջավայրը՝ Հայաստանում տեղի ունեցած փոփոխություններով պայմանավորված, իր ազդեցությունն է ունենում Արցախի վրա։ Դա անշուշտ ենթադրելու է բոլորովին նոր իշխանական կազմ ու բոլորովին նոր վարքագիծ»։
Միևնույն ժամանակ մեր զրուցակիցն ասաց՝ Արցախի քաղաքական դաշտի որակի և բովանդակության վրա առանձին պաշտոնյաներ ունեն իրենց ազդեցությունը, բայց ընդհանուր առմամբ առողջացումը պայմանավորված է լինելու շատ ավելի լայն շերտերով. «Այդ թվում նաև այն հանգամանքով, թե Արցախում ինչպիսին կլինի քաղաքական մրցակցությունը։ Մեծ հաշվով Արցախում մինչև հիմա այդպիսի մրցակցություն չի եղել, եղել է իշխող մի համակարգ, որը Հայաստանի համակարգի մի մասն է եղել, և այդ համակարգը ձևավորել է նաև արցախյան հիերարխիան։ Քաղաքական դաշտի առողջացումն էապես պայմանավորված է լինելու քաղաքական այլընտրանքների առկայությամբ ու մրցակցությամբ։ Ընդհուպ նախագահի փոփոխությունը կարող է լինել որոշակի նախադրյալ կամ խթան, բայց ոչ բավարար։ Ի վերջո իշխանությունն ունի իր տրամաբանությունը, և այն որոշակիորեն պահպանողական է։ Եվ ամեն իշխանություն ձգտում է այս կամ այն կերպ ունենալ հնարավորինս ամուր դիրքեր։ Քաղաքական համակարգի որակը պայմանավորված է նրանով, թե իշխանությունն ինչ այլընտրանքներ կունենա հանրային շրջանակներում»։
Արշավիր Ղարամյանի հրաժարականի քաղաքական պատճառները հայտնի չեն, արդյոք սա Արցախում սպասվող կադրային փոփոխությունների ևս մեկ դրսևորում է, թե ոչ՝ ևս հստակ չէ։ Արցախցի իրավապաշտպան Կարեն Օհանջանյանը կարծում է, որ անկախ Ղարամյանի որոշումից՝ նրա պոտենցիալը պետք է օգտագործվի նաև հետագայում. «Ես բանակի, ազգային անվտանգության ոլորտների երկրորդ այսպիսի մասնագետ չեմ ճանաչում։ Հայ ազգում չկա երկրորդ նման գիտելիքներ ունեցող մեկը, նա հրաշալի գաղափարներ ունի թե՛ ԶՈՒ-երի, թե՛ անվտանգության համակարգի կոնցեպցիայի շուրջ։ Ըստ իս՝ Նիկոլ Փաշինյանն ու Արայիկ Հարությունյանը նրան ինչ-որ այլ բան պետք է առաջարկեն»։