Հուլիսի 22-ին ԱԳ նախարար Էդվարդ Նալբանդյանն ընդունեց Մեծ Բրիտանիայի լորդերի պալատի անդամ բարոնուհի Քերոլայն Քոքսի գլխավորած պատվիրակությանը:
Ողջունելով հյուրին՝ արտգործնախարարը բարձր գնահատեց Քերոլայն Քոքսի Հայաստանին և Արցախին մշտապես ցուցաբերվող աջակցությունը և նշեց որ բարոնուհու գործունեությունը գնահատվում է հայ ժողովրդի կողմից:
Բարոնուհի Քոքսը, շնորհակալություն հայտնելով ջերմ խոսքերի համար, նշեց, որ, մշտապես առանձնահատուկ վերաբերմունք է տածել Հայաստանի նկատմամբ, և վստահեցրեց, որ շարունակելու է իր գործունեությունն՝ ի նպաստ հայ-բրիտանական հարաբերությունների առավել ամրապնդման:
Հանդիպման ընթացքում զրուցակիցներն անդրադարձան հայ-բրիտանական հարաբերությունների ներկա փուլին և հեռանկարներին: Այդ համատեքստում բարոնուհի Կոքսը կարևորեց նախարար Նալբանդյանի՝ անցյալ շաբաթ Լոնդոն կատարած այցելությունը. հանդիպումը ՄԹ արտգործնախարար Ուիլյամ Հեյգի և Եվրոպայի հարցերով նախարար Դեվիդ Լիդինգտոնի հետ, ելույթը Ռազմավարական ուսումնասիրությունների միջազգային կենտրոնում՝ նշելով, որ դա լավ հնարավորություն էր բրիտանացի փորձագետների համար՝ առաջին ձեռքից ծանոթանալու Հայաստանի արտաքին քաղաքականությանը:
Զրույցի ընթացքում քննարկվեցին երկկողմ միջխորհրդարանական համագործակցությանը վերաբերող հարցեր:
Քերոլայն Քոքսի խնդրանքով Էդվարդ Նալբանդյանը ներկայացրեց արցախյան հիմնախնդրի կարգավորման գործընթացի վերջին զարգացումները:
