Ինչպես գրում է ռուսական Московский комсомолец-ը, Չեչնիային, չգրված օրենքի համաձայն, ընդհանրապես հեռու են պահում բանակից և չեչեններին չեն զորակոչում Ռուսաստանի բանակ:
Հուլիսի 15-ին պարզ է դարձել, որ հաշվառման կանգնած մոտ 7 հազար չեչեն երիտասարդներից և ոչ մեկը չի զորակոչվել: Չեչնիայի կենտրոնական զինկոմիսարիատում ասել են, որ իրենք ամբողջությամբ պատրաստ էին կատարել ծրագիրը, սակայն Գլխավոր շտաբից ոչ մի հրահանգ չեն ստացել:
Թերթը փորձել է պարզել, թե որն է այս քայլի պատճառը:
Պաշտպանության նախարարությունում ասել են, որ Մոսկվայից կոնկրետ հրահանգներ չեն եղել այս ուղղությամբ: Ավելի անկեղծ են գտնվել գլխավոր շտաբում, որտեղ հաստատել են Չեչնիայից զորակոչելու վրա արգելք դնելու փաստը՝ հավելելով, որ չեն ցանկանում ռուսաստանյան բանակում ռազմական գործ սովորեցնել պոտենցիալ ահաբեկիչներին: «Ինչքան ուզում ես՝ գայլի գլխին ավետարան կարդա, նա, միևնույն է, վերջում ասում է՝ հոտը գնաց: Գաղտնիք չէ, որ շատ չեչեններ գրոհայինների զարմիկներ են: Ենթադրենք՝ մենք նրանց զորակոչենք բանակ, իսկ նրանցից մեկը լինի Շամիլ Բասաևի հորեղբոր որդին, որը հոգով գրոհային է և գործով՝ լավ մարտիկ, իսկ ի՞նչ կլինի հետո»,- ասել է Գլխավոր շտաբի աղբյուրը:
Բացի այդ, շատ դժվար է պարզել, թե չեչեններից ով է լոյալ կենտրոնական իշխանություններին, ով՝ ոչ: Այսպես ավելի հեշտ է՝ բանակից «զրկել» բոլորին անխտիր: