Վրաստանի նախագահ Սալոմե Զուրաբիշվիլին հայտարարել է, որ Թբիլիսիի և Կիևի միջև «վստահության պակաս» է առաջացել Օդեսայի շրջանի նախկին նահանգապետ Միխայիլ Սահակաշվիլիի Ուկրաինայի փոխվարչապետի պաշտոնում հնարավոր նշանակման պատճառով. դա մտահոգիչ է երկրի հասարակության և ղեկավարության համար:
Նախկինում Սահակաշվիլին հայտարարել էր, որ Զելենսկին նրան առաջարկել է զբաղեցնել բարեփոխումների գծով փոխվարչապետի պաշտոնը և հանձնարարել է բանակցություններ վարել ԱՄՀ-ի և այլ ֆինանսական կազմակերպությունների հետ: Ուկրաինայի Գերագույն ռադան պետք է կողմ քվեարկի այդ նշանակմանը, բայց առայժմ պատգամավորների շրջանում նրա թեկնածությանը աջակցություն չկա, այդ թվում նաև «Ժողովրդի ծառա» նախագահական խմբակցությունում: Ռադայի խոսնակ Դմիտրի Ռազումկովը վստահ չէ, որ կաջակցի Վրաստանի նախկին նախագահ, Օդեսայի շրջանի նախկին նահանգապետ Միխեիլ Սահակաշվիլիի փոխվարչապետի պաշտոնում նշանակմանը:
Զուրաբիշվիլին նշել է, որ գիտակցում է այլ պետության ներքին գործերին և կադրային քաղաքականությանը միջամտելու անընդունելիությունը, այնուամենայնիվ, «անթույլատրելի է և ամբողջովին անհասկանալի Ուկրաինայի ղեկավար կազմում ընտրել այնպիսի մարդու, որի հանցավոր գործողությունները հաստատվել են ոչ միայն վրացական դատարանի որոշմամբ, այլև Մարդու իրավունքների եվրոպական դատարանի համապատասխան դատավճռով»:
