Վրաստանի խորհրդարանը դիմել է Ուկրաինայի Գերագույն ռադայի պատգամավորներին՝ Միխեիլ Սահակաշվիլիին բարեփոխումների գծով փոխվարչապետ չնշանակելու խնդրանքով: Այս մասին հաղորդում է «Օբոզրեվատել» պորտալը՝ Վրաստանի խորհրդարանի խոսնակ Արչիլ Տալակվաձեի պաշտոնական նամակին հղումով:
Պաշտոնական փաստաթուղթը հասցեագրվել է Ուկրաինայի Գերագույն ռադայի նախագահ Դմիտրի Ռազումկովին:
Վրաստանում վստահ են, որ Միխեիլ Սահակաշվիլիի Ուկրաինայի փոխվարչապետի պաշտոնում նշանակվելը բացասաբար կանդրադառնա երկու երկրների հարաբերությունների և հետագա համագործակցության վրա:
Նամակում վրացական կողմը հիշեցրել է, որ Ուկրաինայի փոխվարչապետի պաշտոնի հավանական թեկնածուն իր հայրենիքում հեռակա կարգով մեղավոր է ճանաչվել մի շարք աղմկահարույց քրեական գործերով:
Խորհրդարանականները հիշեցրել են, որ Ուկրաինան և Վրաստանը վաղեմի դաշնակիցներ են և սովոր են լսել միմյանց կարծիքը: Վրաստանի խորհրդարանի խոսնակը հիշեցրել է, որ պաշտոնական Թբիլիսին և Կիևը շատ ընդհանուր նպատակներ և մարտահրավերներ ունեն համաշխարհային ասպարեզում, որոնք հնարավոր է հաղթահարել այդ թվում և համատեղ ջանքերով: Դա վերաբերում է նաև երկու երկրների տարածքային ամբողջականության վերականգնմանը, ՆԱՏՕ-ին և ԵՄ-ին անդամակցության հարցերին: Վրացական կողմը նույնիսկ պատրաստակամություն է հայտնել Սահակաշվիլիի դեմ քրեական գործի նյութերն ուղարկել Ուկրաինա և Գերագույն ռադային խնդրել է հետաձգել նշանակումը մինչև այդ փաստաթղթերի ուսումնասիրությունը:
