Ցամաքային կրիան, որի առջևի թաթը վերջերս հեռացրել են, կտեղաշարժվի պրոթեզ-անիվի օգնությամբ: Այս մասին հաղորդում է Associated Press գործակալությունը: Տեղադրման վիրահատությունն իրականացրել են Վաշինգտոնի համալսարանի անասնաբուժության մասնագետները:
Անասնաբույժների խոսքերով, 13-ամյա Գամերային իրենց մոտ են բերել դեռ գարնանը: Կենդանու տերը դիմել էր անասնաբույժներին, քանի որ նկատել էր, որ կենդանու մոտ ցավում է թաթերից մեկը: Երբ բժիշկները զննել են Գամերային, չեն կարողացել պարզել ցավի պատճառը:
Նրան սկսեցին բուժել, սակայն անօգուտ: Արդյունքում որոշվեց հեռացնել առջևի թաթը: Դրանից հետո անասնաբույժները հատուկ պրոթեզ են ստեղծել, որը գործում է կահույքի անիվի սկզբունքով: Հիմա, ինչպես նշում են Գամերայի բժիշկները, կրիան իրեն անհամեմատ ավելի լավ է զգում և կարող է շարժվել շատ արագ: Վիրահատությունից հետո կրիան արդեն վերականգնվել է և սկսում է կամաց-կամաց քաշ ավելացնել:
Այդ պրոթեզը Գամերային կծառայի մի քանի տարի, որից հետո այն պետք է փոխարինել:
