Ուկրաինայի ՆԳ նախարար Արսեն Ավակովը Twitter-ի իր միկրոբլոգում գրառում է կատարել՝ հարգանքի տուրք մատուցելով Հայոց ցեղասպանության զոհերի հիշատակին՝ մասնավորապես նշելով. «Ապրիլի 24-ը Հայոց ցեղասպանության հիշատակի օրն է, ողբերգության 105-րդ տարելիցը: Ողբերգության, որն աշխարհն այն ժամանակ գերադասեց չնկատել։ Բայց անպատժելիությունը ծնում է նորանոր հանցագործություններ…»:
Ավելի վաղ Ուկրաինայի ԱԳ փոխնախարարը Վ. Բոդնարը նամակ էր հղել պետական մարմինների ներկայացուցիչներին՝ խնդրելով չմասնակցել Հայոց ցեղասպանության 105-րդ տարելիցի ոգեկոչման միջոցառումներին և չարտասանել «Հայոց ցեղասպանություն» եզրույթը։
«Առաջին լրատվական»-ի հետ զրույցում անդրադառնալով այս դիտարկմանը՝ քաղաքագետ Ստեփան Գրիգորյանը նշեց. «Դա Ուկրաինայի արգործնախարարության կարծիքը չէ, փոխնախարարի կարծիքն է, և դա այնքան էլ կարևոր չէ: Բոլորին հայտնի է, որ Ուկրաինայում շատ մեծ դեր ունի Արսեն Ավակովը. նա սկզբունքային դեր խաղացող, Ուկրաինայի անկախությունը պահպանող գործիչ է, և նրա խոսքը շատ ավելի արժեքավոր է… Որքան էլ չընդունենք Ուկրաինայի փոխարտգործնախարարի ասածը, պետք է անկեղծորեն հիշենք, որ բոլոր քվեարկություններում Հայաստանը դեմ է քվեարկում Ուկրաինային՝ Ռուսաստանի հետ միասին… Ուկրաինայի հետ պետք է աշխատել, քաղաքականության փոփոխություն պետք է լինի»:
Անդրադառնալով Արցախյան հակամարտության բանակցային գործընթացի վերաբերյալ Լավրովի հայտարարությանը, որում նա նշել է, որ «սեղանին դրված է Լեռնային Ղարաբաղի հակամարտության կարգավորման փուլային տարբերակը», Ստեփան Գրիգորյանը նշեց. «Լավրովը միջազգային մակարդակի դիվանագետ է, դա ընդունում են բոլորը, և այդպիսի մարդը երկու լրջագույն վրիպո՞ւմ է թույլ տալիս. մեկնաբանելով Ղարաբաղյան հակամարտության կարգավորման հարցը, երբ խոսում էր 4 բանաձևերի մասին, դա կապեց փուլային տարբերակի հետ, դա վրիպում չէր, և վիրիպում չէր նաև գազի հարցը մեզ երեսով տալը… Լավրովի հայտարարությունը կապված է Նիկոլ Փաշինյանի անձի հետ. Ռուսաստանի համար անընդունելի է հեղափոխությամբ իշխանության եկած անձը… Հայաստանի օրինակը ավտորիտար Ռուսաստանի համար վտանգ է: Լավրովի այս քայլը միտված էր մեկ հարցի. նրանք դրանով սկսեցին պայքար Նիկոլ Փաշինյանին իշխանությունից հեռացնելու համար»:
«Հինգերորդ շարասյունը ամեն կողմից հուժկու հարվածներ է տալիս Փաշինյանին»,- նշեց քաղաքագետը՝ հավելելով, որ Լավրովի հայտարարության մեջ նրանց մատը խառն է:
Մանրամասն՝ տեսանյութում:
